Hnub Chiv Tim 21 Lub 8 Hlis 2022 (Sunday Homily)

Hnub Chiv Tim 21 Lub 8 Hlis 2022

Lub caij nyob nruab xyoo
Lus Kas 1:39-56
Nyob zoo ib tsoom…

Hnub no yog hnub chiv tim 21 lub 8 hlis ntuj. Tab sis mas Lub Koom Txoos
Catholic nyob thaib teb ua hmoov txog Niam Mab Liab mus saum ntuj, lus English
hu tias “Solemnity of the Assumption of the Blessed Virgin Mary.” Hnub no muaj
kev tseem ceeb zoo li cas?
Nyob hauv lub xyoo 1950, Vaj Qhia Pius XII tshaj tawm tias Leej Niam Mab Liab,
Tswv Ntuj Leej Niam, tau ua nws txoj hauj lwm tiav lawm, ces Tswv Ntuj txais
nws lub cev ntaj ntsug thiab tus plig mus nyob saum ntuj. Nws tsis muaj lub keeb
txhaum vim tias nws yog Tswv Ntuj leej niam. Tswv Ntuj tau npaj niam Mab Liab
rau nws Leej Tub, Yes Xus.
Muaj ib yam uas yuam tsum ceev faj, peb cov ntseeg Catholic hwm niam Mab
Liab tab sis peb tsis teev nws. Peb teev Tswv Ntuj xwb. Peb hwm Niam Mab Liab
zoo li peb niam, zoo li peb hwm cov Leej Ntshiab, vim tias nws yog tib neeg muaj
koob hmoov dua txhua txhua leej. Peb siv lo lus “teev” rau Tswv Ntuj xwb. Peb
tsis siv lo lus teev rau Niam Mab Liab, cov leej ntshiab thiab lwm tug. Thov nej
sawv daws nkag siab txog zaj no kom zoo mog.
Ces, peb cia pom dab tsi ntawm Niam Mab Liab mus saum ntuj? Yam tim ib, yog
peb pom peb lub hom phiaj ntawm txoj kev ntseeg Niam Mab Liab ua tus piv
ntxwv rau peb cov ntseeg tias txog hnub Yes Xus rov los, peb lub cev ntaj ntsug
thiab tus plig yuav mus saum ntuj nrog Tswv nyob ib yam li niam Mab Liab. Thov
kom nej sawv daws muaj kev cia siab thiab nruaj nreb hauv txoj kev ntseeg ntxiv
mus.
Yam tim ob, peb pom tias Niam Mab Lia blub neej tsis ntxawv ntxav ntawm cov
tib neeg. Niam Mab Liab tsis muaj hwj huaj dab tsi. Nws lub neej kuj zoo li neeg
ntiaj teb. Tab sis, nws yog ib tug neeg ntseeg txog Tswv Ntuj, nws tsis muab hlob.
Niam Mab Liab cia pom cov neeg txom nyem thiab cev tes mus pab. Nyob hauv
zaj no Elizabeth yog tus neeg laus uas tsis muaj tub ki tsis muaj qes. Niam Mab
Liab kuj mus pab saib xyuas nws. Peb thiaj coj Niam Mab Liab tus yam ntxwv
nyob hauv peb lub neej. Thov kom nej txhob muab hlob thiab nruaj nres nyob hauv
txoj kev ntseeg mus li.