THAUM PEB TSOB HWB TSWV NTUJ THIAB LWM TUS CES YOG PEB TAU MUS HAUV LUB QHOV ROOJ NQAIM NTAG

Vaj Qhia Fas Ntshis Kus ntuas kom sawv daws ua tiag mus hauv lub qhov rooj nqaim vim tias lub qov rooj nqaim yog Tswv Ntuj txoj sia thiab kev cawm, peb tsum tau hla, txais thiab yuav Tswv Ntuj Lo Lus.

Hnub Chiv tim 21 lub 8 hli 2022 mas Vaj Qhia Fas Ntshis Kus rov nthuav Tswv Ntuj Lo Lus rau tsoom ntseeg tau mloog dua. Nyob hauv Ntawv Moo Zoo muaj ib tug neeg los nug Huab Tais Yes Xus tias cov yuav txais kev cawm puas yog cov tsawg, ces Huab Tais Yes Xus teb tias ‘nej ua tiag mus hauv lub qhov rooj nqaim’ (LK 13: 24), mas Vaj Qhia thiaj hais rau sawv daws tias lub qhov rooj nqaim ua rau peb ntshai vim tias muaj tsawg tsawg leej thiaj raug xaiv los yog zoo txhij tau txais kev cawm. Tiam sis Huab Tais Yes Xus hais meej tias cov neeg nyob tas qhov txhia chaw yuav tuaj koom rooj qav nyob hauv Ntuj Ceeb Tsheej, yog li thiaj hais tau tias lub qhov rooj nqaim qhib cia rau peb txhua tus neeg.

Vaj Qhia nthuav rau sawv daws paub tias nyob hauv Huab Tais Yes Xus tiam neeg mas lub qhov rooj nqaim yog qhov lawv pom tau yooj yim; xws li thaum hmo ntuj lub rooj loog loj kaw lawm tiag, tiam sis lub qhov rooj me mas yuav tsis kaw. Li ntawd mas cov neeg tawm rooj yuav rov los hauv lawv lub nroog mas kawg chaw lub qhov rooj me ntawd los xwb. Yog li Huab Tais Yes Xus thiaj hais tias ‘kuv yog lub qhov rooj, tus twg nkag ntawm kuv mus nws yuav txais kev cawm’ (Z 10: 9). Huab Tais Yes Xus hais li no mas thiaj txhais tau tias yog peb xav mus txais txoj sia nyob hauv Tswv Ntuj, txais kev cawm, mas yog peb tsum nkag hauv Huab Tais Yes Xus mus, peb tsum txais Huab Tais Yes Xus los nyob hauv peb, thiab peb tsum txais Huab Tais Yes Xus Lo Lus.

“Kev hla lub qhov rooj nqaim yog kom peb txais Leej Pleev ua peb tus Huab Tais thiab peb tsum raws nws qab.” Vaj Qhia phua lub ntsiab, “Peb tsum ua neej nyob hauv kev sib nyiam, kev sib tsob hwb, thiab cev peb rau Tswv Ntuj xws li peb pom tias Huab Tais Yes Xus tau hla lub qhov rooj nqaim nyob saum tus Ntoo Cuam. Kev chaw mus taug Tswv Ntuj txoj kev mas peb yuav tau hla kom dhau peb lub qia dub, peb kev muab hlob khav theeb, thiab tub nkeeg.”

Vaj Qhia xav kom tsoom ntseeg pom meej mas Vaj Qhia thiaj hais ua piv txwv tias xws li niam txiv tau muab lawv lub neej los tu lawv cov me nyuam, cov neeg siab zoo qee lawv lub sij hawm los ua hauj lwm tu cov neeg laus, cov txom nyem, cov neeg ua hauj lwm nrhiav noj txawm tias muaj xwv txheej tuaj cuam tshuam lawv, cov raug txom nyem vim lawv kev ntseeg tsis kav lawv tsis tso kev thov Ntuj thiab kev sib nyiam tseg, cov neeg ua zoo pauj rau cov ua phem rau nws.

Kawg no Vaj Qhia hais ob peb lo lus cia rau sawv daws coj mus xav tias peb yuav tau tig rov los xav txog peb lub neej, saib peb nco txog peb xwb thiab peb tsuas nrhiav txiaj ntsim pub rau peb xwb, los yog peb tab tom ua tiag mus hauv lub qhov rooj nqaim kom tau txais txoj siab tseeb tuaj ntawm Tswv Ntuj tuaj.

Vaj Qhia kom sawv daws thov niam Mab Liab tus raws Huab Tais Yes Xus mus txog tus Ntoo Cuam, kom niam Mab Liab pab peb ua siab loj nrog nraim Huab Tais Yes Xus mus txog txoj sia nyob mus li.