ZAJ NYEEM NIAJ HNUB. Tim 29 lub 8 hli 2022 (Daily reflection)

ZAJ NYEEM HNUB TIM 29 LUB 8 HLI, NCO TXOG HNUB ZAM NTXUAV PLIG RAUG TXIAV CAJ DAB
COV LUS NYOB HAUV MAS KOS NTAWV MOO ZOO (MK 6: 17-29)

Kwv tij Hmoob, hnub no peb nco txog hnub Zam Ntxuav Plig raug txiav caj dab. Ua cas Zam thiaj raug txiav caj dab li ntawd, vim Zam ntuas tus vaj Hes Los kom tsis txhob yuav nws tus tij laug tus poj niam los ua nws poj niam. Qhov no ua rau Hes Los Dias uas yog Hes Los tus tij laug tus poj niam tsis txaus siab, ces nws thiaj nrhiav sij hawm zoo ntxias kom Hes Los muab Zam tua.
Ntawv Moo Zoo hais tias thaum txog hnub Hes Los haus cawv xeeb mas Hes Los Dias tus ntxhais xeev cev tau ntxim Hes Los thiab cov qhua siab kawg, Hes Los thiaj pub paj tshab rau nws. Hes Los Dias pom tias yog txog hnub nws yuav tau muab Zam tua, mas nws thiaj ntxhi rau tus ntxhais kom thov Hes Los muab Zam lub taub hau ua paj tshab rau nws.
Hes Los tsis xav kom cov qhua hais tau tias nws yog tus vaj hais lus tsis muaj hwj chim mas txawm nws tu siab tsis kav nws tsum tau ua li hais, ces nws thiaj kom lawv txiav Zam caj dab.
Kwv tij Hmoob sawv daws, nej xav li cas txog zaj no?
Raws li kuv xav mas yog li no: yog peb nyiam peb hlub leej twg mas txawm yuav raug xwv txheej li cas los peb txhob ntshai ntuas kom nws los nyob hauv txoj kev zoo kev tsim txiaj xws li Zam Ntxuav Plig tau ntuas Hes Los, peb txhob ua tej yam txhaum Ntuj kev cai kom tau txuag peb ntsej muag los hwj chim xws li Hes Los tau ua, peb txhob khaw lwm tus cov lus ntuas lus cem los ua kev cib nyeej, kev chim nyob hauv peb lub neej vim tias lub siab cib nyeej siab chim no muaj peev xwm coj peb mus ua txhaum tau xws li Hes Los Dias.
Nyob zoo sawv daws.