ZAJ NYEEM NIAJ HNUB. Tim 31 lub 8 hli 2022 (Daily reflection)

ZAJ NYEEM HNUB TIM 31 LUB 8 HLI, HNUB PLAUB LUB LIS PIAM 22 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 4: 38-44)

Kwv tij Hmoob sawv daws, nyob hauv Yes Xus lub Moo Zoo mas peb pom Huab Tais Yes Xus tau ua hwj huam ntau los kho cov neeg muaj mob, cov raug dab kom rov zoo tuaj, mas ua rau peb xav tias thaum peb tig los ntseeg Ntuj lawm mas Huab Tais Yes Xus yuav cawm peb hauv peb tej teeb meem, hauv cov xwv txheej tuaj raug peb lub neej.
Hnub no Huab Tais Yes Xus qhia rau peb tias tos Ntuj xa nws tuaj nyob ntiaj teb no mas yog kom nws tau tshaj lub Moo Zoo hais txog Tswv Ntuj lub Ceeb Tsheej.
Li ntawd mas cov kwv tij Hmoob, kuv xav kom nej txhob to taub yuam kev txog qhov no, mas nej thiaj yuav nkag siab tias thaum nej hloov siab tshiab los ua ib tug neeg ntseeg lawm, mas nej yuav tau pab Huab Tais Yes Xus tshaj lub Moo Zoo rau sawv daws. Nej yuav tau qhia txog Tswv Ntuj lub siab hlub neeg, khuv leej neeg rau sawv daws. 
Nej txhob hais rau luag tej tias ‘tos koj muaj mob, tos koj lub neej tsis zoo xws li lwm tus mas vim koj tsis ntseeg Ntuj’, los nej txhob hais tias ‘yog koj ntseeg Ntuj mas koj yuav tau zoo xws li koj ntshaw, koj yuav tsis muaj mob, tsis muaj xwv txheej los raug koj li.’ 
Kwv tij Hmoob, nej txhob hais li no mog!
Nej yuav nco tias kev mob nkeeg, los cov xwv txheej tuaj nphav tuaj raug neeg ntawd, yog ib yam cia rau peb tau cev tes mus pab lawv, tau pub Tswv Ntuj kev nyiam rau lawv, tau cev Tswv Ntuj lub Ceeb Tsheej rau lawv.
Li ntawd mas cov kwv tij Hmoob, nej yuav hlob cov neeg txom nyem, nej yuav pab cov neeg raug xwv txheej mog, nej yuav thov Ntuj rau lawv tsis tseg mog.
Nyob zoo sawv daws.