ZAJ NYEEM NIAJ HNUB. Tim 2 lub 9 hli 2022 (Daily reflection)

ZAJ NYEEM HNUB TIM 2 LUB 9 HLIS, HNUB RAU LUB LIS PIAM 22 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 5: 33-39)

Kwv tij Hmoob sawv daws, Huab Tais Yes Xus hais tias ‘tsis muaj leej twg yuav dua ib diag ntawm lub tsho tshiab los ntxiv rau lub khaub tsho, tsis muaj leej twg yuav ntim cawv tshiab rau hauv tej qub hnab tawv, thiab tsis muaj ib tug neeg uas tau haus cov cawv laus tas yuav xav haus cov cawv tshiab’, mas yog Huab Tais Yes Xus tab tom hais rau peb kom txhob kaw peb lub siab cia tsis kam txais tej yam tshiab tshiab. Yog peb xav paub Huab Tais Yes Xus mas peb tsum qhib siab, ntxuav peb lub siab kom tshiab mloog mas peb thiaj yuav to taub.
Cov kwv tij, nej muab xav saib, yog tias peb niam peb txiv los yog peb pog peb yawg lawv ua siab nqaim tsis qhib siab kom dav mloog cov Txiv Plig tuaj tshaj Ntuj Lus rau peb Hmoob mas niaj hnub no ntshai peb cov Hmoob tseem yuav tsis paub txoj kev mus cuag Tswv Ntuj lub Ceeb Tsheej.
Cov kwv tij, nyob hauv peb tiam neeg no mas lub ntuaj nqaim nqaim thiab muaj kev kawm ntau yam, ces sawv daws nyias tsuas qhuas nyias tias muaj kev txawj ntse, ua rau peb ib txhia tsis kam ntseeg tias muaj Tswv Ntuj, tsis ntseeg tias muaj ib hnub Tswv Ntuj yuav txiav txim rau neeg mus raws neeg cov hauj lwm.
Li ntawd mas kwv tij Hmoob sawv daws, kuv xav kom nej qhib nej ob lub qhov muag, ua nej lub siab kom kaj los mloog Tswv Ntuj Lo Lus saib qhia tau dab tsi rau nej, pab nej lub neej tau li cas, Tswv Ntuj Lo Lus yog lus tseeb los yog cov lus neeg txheej thaud lam xev cia qhuab ntuas tib neeg xwb.
Nyob zoo sawv daws.