ZAJ NYEEM NIAJ HNUB. Tim 27 lub 8 hli 2022 (Daily reflection)

ZAJ NYEEM HNUB TIM 3 LUB 9 HLIS, NCO TXOG LEEJ NTSHIAB VAJ QHIA NQES NKOS LIS TUS LOJ
COV LUS NYOB HAUV LUS KAS NTAWV MOO ZOO (LK 6: 1-5)

Kwv tij Hmoob sawv daws, nej hnov cov Fas Lis Xais hais tias ‘vim li cas nej ua tej yam uas hnub Xas Npas Tos yuav tsum caiv?’, thiab nej yuav hnov Huab Tais Yes Xus teb rau cov Fas Lis Xais tias ‘thaum Das Vis thiab cov npawg tshaib plab, mas lawv mus hauv Tswv Ntuj lub tsev, lawv muab cov ncuav mov txi Ntuj noj kom cawm tau lawv.’
Cov kwv tij Hmoob sawv daws, Tswv Ntuj lo lus qhia kom caiv hnub Xas Npas Tos mas yog muaj lub ntsiab li cas thiab ua cas Tswv Ntuj thiaj kom caiv?
Lub ntsiab mas yog li no: Tswv Ntuj xav tshwj ib hnub hauv lub lis piam cia rau tib neeg nco txog Tswv Ntuj qhov zoo uas tau tsim ntuj tsim teb thiab cawm sawv daws hauv txoj kev txhaum, yog hnub ntiaj teb neeg yuav tau nqua suab cav txog Tswv Ntuj lub koob meej. Li ntawd hnub no mas tas sawv daws thiaj yuav so hauj lwm, so lub cev thiab lub tswv yim. 
Yog li mas kwv tij Hmoob sawv daws, Tswv Ntuj kom caiv hnub Xas Npas Tos thiaj tsis yog kom caiv xws li cov Fas Lis Xais nkag siab. 
Kwv tij, txij thaum Huab Tais Yes Xus tuag thiab sawv rov los hauv thawj hnub lub lis piam mas cov ntseeg thiaj saib hnub ntawd yog Hnub Ntshiab, yog hnub sawv daws yuav tau sib sau los ua kab ke lov mov thiab mloog Tswv Ntuj Lo Lus ua ke, ces peb cov ntseeg thiaj hloov ntawm hnub Xas Npas Tos los yog Hnub Xya lub lis piam los ua Hnub Chiv lub lis piam li niaj hnub nyem no.
Yog li mas kwv tij Hmoob sawv daws, tsim nyog txog Hnub Chiv mas peb yuav mus sib txoos cav txog Tswv Ntuj lub txiaj ntsim, mus nco txog Tswv Ntuj kev nyiam peb, mus hu nkauj qhuas txog Tswv Ntuj ua ke nyob hauv peb cov tsev teev Ntuj, peb yuav tshwj Hnub Chiv cia ua hauj lwm tsob hwb lwm tus, cia ua hnub peb ua cov hauj lwm zoo tsis yog cia ua tej yam txhaum.
Nyob zoo sawv daws.