Hnub Chiv Tim 4 Lub 9 Hlis 2022 (Sunday Homily)

Hnub Chiv Tim 4 Lub 9 Hlis 2022

Lub caij nyob nruab xyoo
Lus Kas 14:25-33

“Leej twg tsis kwv nws tus ntoo cuam thiab tsis lawv kuv qab, mas nws ua tsis tau kuv
thwj tim.”
Cov kwv tij Hmoob, lub Moo Zoo hnub no mas Huab Tais Yes Xus hais txog “kev ua
Yes Xus cov thwj tim.” Huab Tais Yes Xus hais tias “Leej twg los raws kuv, yog nws tsis
nyiam kuv dua nws niam nws txiv, nws poj niam me nyuam, nws cov kwv tij thiab cov
muam, thiab yog nws nyiam nws txoj sia dua kuv, mas tus ntawd ua tsis tau kuv thwj
tim.” Thaum mloong cov lus no tas ces cov lus no ua rau peb nyuaj siab kawg puas
yog?
Kev ua tim khawv txog Tswv Ntuj tsis yooj yim. Yus yuav tsum muab yus lub neej tas
siab tas ntsws los ua Tswv Ntuj txoj hauj lwm. Cov txiv plig cov leej phauj thiab cov tshaj
Tswv Ntuj lub Moo Zoo yog tus piv txwv. Huab Tais Yes Xus caw peb sawv daws raws
nws qab, yus yuav tsum nyiam Huab Tais Yes Xus dua yus niam yus txiv thiab yus cov
poj niam cov me nyuam. Huab Tais Yes Xus xav qhia peb tias vim Huab Tais Yes Xus,
peb yuav tsum nyiam lwm tus thiab. Txhob nyiam peb cov niam txiv kwv tij neeg tsa
xwb. Peb yuav tsum nyiam luaj tej thiab cov uas tsis yog peb phooj ywg thiab, sis cov
neeg pluag txom nyem, cov neeg tsis muaj leej twg xav sib tham, cov neeg tsis muaj
leej twg xav nrog lawv sib pab sib pawg, cov neeg muaj kev nyuaj siab kawg, cov neeg
muaj teeb meem hauv lub neej, cov neeg tsis muaj leej twg nyiam. Yus yuav paub tias
yus nyiam Huab Tais Yes Xus dua yus niam yus txiv kuj yuav tsum ua li no xwb.
Cov lus uas Huab Tais Yes Xus hais rau peb hnub no ua rau peb saib ntawm yus tus
kheej thiab xav tswv yim thiab nug yus tus kheej tias peb puas yog Huab Tais Yes Xus
cov thwj tim? Peb puas raws nws qab thiab ua raws li nws hais? Kev ua Huab Tais Yes
Xus cov thwj tim tsis yooj yim tab sis mas kuj tsis nyuaj kawg uas rau peb ua tsis tau.
Peb tseem muaj sij hawm hloov siab tig los nhriav Tswv Ntuj thiab tsob hwb nws, ua
qhov uas peb ua tau. Huab Tais Yes Xus tsis qhia kom peb txhob nyiam niam thiab txiv,
poj niam thiab me nyuam los cov kwv tij neeg tsa, tab sis mas Huab Tais Yes Xus qhia
kom peb muaj siab dav muaj siab loj hlub lwm tus, nyiam sawv daws.
Thov Tswv Ntuj nrog nej nyob, ua nej siab kaj lug mog!