ZAJ NYEEM NIAJ HNUB. Tim 5 lub 9 hli 2022 (Daily reflection)

ZAJ NYEEM HNUB TIM 5 LUB 9 HLIS, NCO TXOG LEEJ NTSHIAB TES LES XAS NYOB KAS KWS TAS
COV LUS NYOB HAUV LUS KAS NTAWV MOO ZOO (LK 6: 6-11)

Cov kwv tij Hmoob, lub Moo Zoo hnub no mas tseem yog hais txog Tswv Ntuj Lo Lus tias ‘koj yuav caiv Tswv Ntuj hnub hnub’ uas cov Yus Das hais tias yog ‘hnub Xas Npas Tos’ los ‘Hnub Xya’.
Ntawv Moo Zoo hais tias cov Kws Ntawv Ntshiab thiab cov Fas Lis Xais nyas ntsia saib Huab Tais Yes Xus puas yuav ua hauj lwm hauv hnub caiv. Lawv pom tias Huab Tais Yes Xus tsis caiv, Huab Tais Yes Xus ua txhaum lawv txoj cai, uas yog Tswv Ntuj 10 Lo Lus qhia.
Tiam sis Huab Tais Yes Xus paub tias lawv xav li cas, nws thiaj nug lawv tias “Hnub Xas Npas Tos, puas kheev ua zoo los ua phem?”
Kwv tij Hmoob, lo lus no mas hnub no kuj yog Huab Tais Yes Xus nug peb thiab, saib nyob hauv peb Hmoob tej kev caiv, tej cai peb coj tsis hais ntseeg Nuj los ntseeg dab, peb saib kev ua zoo loj dua, los peb saib tej kev caiv loj dua?
Hmoob hais tias tsis pub tus qhua tuaj tuag hauv yus tsev tsam txhaum dab qhuas, yog yuav tuag mas cia tuag nraum zoov; Hmoob hais tias tus neeg tuag ntawd kev cai dab qhuas txawv peb, mas peb yuav coj los pam hauv peb vaj peb tsev tsis tau.
Nej muab xav saib puas tsim nyog ua li ntawd!
Cov ntseeg Ntuj mas peb hais tias ‘hnub caiv’ yog hnub qee rau Tswv Ntuj, yog hnub peb yuav saib ua ‘hnub ntshiab’, yogh nub peb yuav nco txog Huab Tais Yes Xus sawv rov los, ces peb thiaj hais tias ‘Hnub Caiv’ mas yog ‘Hnub Chiv’ vim yog hnub peb mus so, mus ua Tswv Ntuj tsaug.
Hnub Chiv peb tso hauj lwm tseg, peb coj peb lub cev thiab tus plig mus so, mus cev rau Tswv Ntuj ua Tswv Ntuj tsaug, tab sis Hnub Chiv tsis cia rau peb caiv txhob pab lwm tus, txhob ua qhov zoo.
Kwv tij, Huab Tais Yes Xus hais tias txoj cai loj tshaj mas yog ‘koj yuav nyiam Tswv Ntuj thiab hlub lwm tus.’
Li ntawd mas yog peb nyiam Tswv Ntuj tiag, peb tsuas hawm Tswv Ntuj thiab saib Tswv Ntuj yog peb tus tseem Huab Tais tiag, mas tsim nyog peb yuav ua qhov zoo, ua cov hauj lwm hlub lwm tus nyob hauv txhua hnub, tshwj xeeb mas yog Tswv Ntuj hnub, los Hnub Chiv.