Hnub Chiv Tim 18 Lub 9 Hlis 2022 (Sunday Homily)

Hnub Chiv Tim 18 Lub 9 Hlis 2022

Lub caij nyob nruab xyoo
Lus Kas 16:1-13

Tsis muaj ib tug tub txib tsob hwb ob tug tswv tau. Nws yeej yuav ntxub ib tug, nyiam
lwm tus. Nej yuav ua Tswv Ntuj tub txib thiab nyiaj txiag tub txib tsis tau.
Nyob zoo…
Hauv Ntawv Moo Zoo hnub no, Huab Tais Yes Xus hais ib zaj paj lug qhia txog tus tim
xyoob xyuam xim. Tus tim xyoob no yog neeg siab tsis ncaj, tab sis mas nws txawj ua
neeg xyuam xim. Nws txawj siv nyiaj txiag ua qhov zoo. Nws txawj xuas tej nyiaj txiag
los coj neeg mus rau hauv kev tsis ncaj, mus tsim phooj ywg. Tus tswv qhuas tus tim
xyoob siab tsis ncaj no. vim tias nws txawj siv nyiaj txiag ua qhov zoo, ua kom nws muaj
kev cawm. Nws paub tias txij no mus, nws siv nyiaj txiag pab nws tsis tau lawm, nws
yuav tsum siv nyiaj txiag ua phooj ywg kom ntau. Vim tias cov phooj ywg ntawd yuav
cawm nws lub neej.
Huab Tais Yes Xus kuj qhia peb sawv daws thiab. Huab Tais Yes Xus qhia tias nej xuas
tej nyiaj txiag los coj neeg mus rau hauv kev tsis ncaj, mus tsim phooj ywg. Ces thaum
nyiaj dua toj tas lawm, cov phooj ywg ntawd yuav txais nej mus hauv cov tsev tsam
phooj nyob mus li. Kwv tij hmoob sawv daws, peb nhriav nyiaj nhriav txiag kuj zoo
lawm. Vim tias nyiaj txiag pab kom peb lub neej zoo dua. Thaum muaj mob muaj nkeeg
kuj siv nyiaj txiag kho mob, thaum saib plab kuj siv nyiaj txiag yuav noj yuav haus,
thaum yus me tub me ntxhais yuav tsum kawm ntaub kawm ntawv kuj siv nyiaj txiag
pab lawv kom muaj kev txawj ntse, muaj kev vam meej yav tom ntej. Nyiaj txiag coj kev
vam neej kev noj qab nyob zoo rau peb lub neej. Tab sis txhob nhriav nyiaj txiag dhau
ua rau yus tsis nco qab tias nyiaj txiag tsis pab peb cawm peb kom muaj txoj sia nyob
mus li. Ib yam li Huab Tais Yes Xus hais: siv nyiaj txiag ua qhov zoo, pab luag tej, pab
cov neeg txom nyem. Thaum yus muaj ntau kuj pab ntau, thaum yus muaj tsawg kuj
pab tsawg. Thov kom peb muaj siab pab luag tej kuj zoo lawm, kuj txaus lawm.
Huab Tais Yes Xus hais tias “Nej yuav ua Tswv Ntuj tub txib thiab nyiaj txiag tub txib
tsis tau.” Peb yuav tsum xaiv peb yog Tswv Ntuj tus tub txib los peb yog nyiaj txiag tub
txib? Peb ua ob yam tsis tau! Nyiaj txiag yog tib neeg tub txib, peb siv nyiaj txiag ua
ntau yam zoo. Huab Tais Tswv Ntuj tib leej xwb thiaj yog peb tus tswv. Peb yog nws tub
txib. Peb yog Tswv Ntuj tub txib.
Thov kom peb muaj zog ua Tswv Ntuj tus tub txib tshaj Ntuj lo lus ntxiv mus os!