Cov tub rog Mias Mas hlawv ze ntawm 30,000 lub tsev

Cov tub rog Mias Mas hlawv ze ntawm 30,000 lub tsev

(Myanmar troops 'have burned 30,000 homes') -UCANews photo-

Nyob hauv 19 lub hlis tag los no xwb, cov tub rog Mias Mas tau hlawv yuav luag  30,000 lub tsev nyob Mias Mas teb. Yog suav txij thaum cov tub rog txeeb kav teb chaws hnub tim 1 lub 2 hlis xyoo 2021 los txog tam sim no. 
Raws kev nthuav tawm nyob Mias Mas teb hnub tim 28 lub 8 hli tag los, hais tias cov tub rog Mias Mas tau hlawv 28,434 lub tsev. Nyob hauv thaj tsam Xas Kais, muaj 20,153 lub tsev raug hlawv, thaj tsam Kas Ves yog 5,418 lub, thiab feem ntau yog cov neeg Npas Mas thiab cov teev hawm Phus Thas nyob nruab nrab hauv Mias Mas teb.
Nyob hauv sab hnub poob kuj muaj 1,474 lub tsev raug hlawv, thiab 1,389 lub raug hlawv nyob lwm qhov chaw.
Hauv 3 thaj tsam uas hais los no, yog cov pej xeem tiv cov tseem hwv uas hu ua PDF lawv nyob txawm. Lawv pom nyob hauv cov thaj tsam no, raug cov tub rog Mias Mas tua hnyav kawg, tsis hais dav hlau los yog phom loj thiab kev tua neeg hauv zej zog. Tej xwm txheej no thiaj ua rau muaj ntau txhiab tus neeg khiav ua thoj nam. 
Ntau tus thawj coj ntawm cov kev teev hawm nrog cov Txiv Plig Kav Tos Liv nyob Mias Mas teb thiab Vaj Qhia Fas Ntshis Kus tau thov kom pab txuag neeg txoj sia thiab txuag tej chaw tseem ceeb, xws li tsev kho mob thiab tsev kawm ntawv nyob hauv lub teb chaws. Tab sis cov tub rog Mias Mas tsis quav ntsej txog lawv tej lus thov no, ces lawv ua tag ua thiab.