MUS UA KE THIAB PAUB UA TSAUG

Nyob hauv Hnub Chiv tim 9 lub 10 hli xyoo no, Vaj Qhia Fas Ntshis Kus ua tswv cuab coj lub Txoos teev Ntuj tsa Tswv Qhia Nkas Las Npis Nis thiab Leej Tij Zas Tis ua Leej Ntshiab. Lub Txoos teev Ntuj yog nyob hauv Leej Ntshiab Pob Zeb lub tshav puam, nyob Vas Tis Kas, muaj cov neeg ntseeg tuaj koom txog li tsib vam leej.  

Lub Moo Zoo hauv hnub no yog zaj hais txog thaum Huab Tais Yes Xus kho kaum tus mob ruas, ces tsuas muaj ib tug xwb thiaj rov los cav txog Tswv Ntuj raws li Lus Kas Ntawv Moo Zoo (LK 17: 11-19).

Vaj Qhia caw tsoom neeg ntseeg sawv daws los nrog xav txog ob yam hauv lub Moo Zoo hnub no: taug kev mus ua ke, thiab ua tsaug.

Vaj Qhia pib hais tias thaum muaj ib tug neeg mob ruas, mas lawv yuav cais nws tawm hauv tsoom sid. Cov neeg mob ruas lawv yuav raug feeb mus nyob ua ib pawg nrug deb zej zos thiab lawv yuav raug txiav tawm hauv lub neej teev hawm. Zaj no muaj ib lub ntsiab zoo qhia rau peb; yog thaum peb paub txog peb txoj kev mob vim peb yog neeg txhaum vam ntsoov txog Tswv Ntuj Leej Txiv khuv leej neeg, mas peb yuav zoo xws li ib cuab kwv tij, yog li mas peb yuav ras ntsoov tias peb yog tus tsis muaj zog, peb vam txog txoj kev cawm.

Vaj Qhia muab ib lo lus cia rau sawv daws tias “Kev ntseeg txhawb peb kom hla tawm hauv peb mus cuag Tswv Ntuj thiab peb cov kwv tij nkauj muam, txhob kaws peb cia. Kev ntseeg nqua hu peb kom ras tias peb vam txog txoj kev cawm thiab kev zam, thiab kom peb muaj feem pab ris lwm tus lub nras.”

Qhov taug kev mus ua ke yog Koom Txoos ib tug yawm sij thiab yog qhov peb yuav nug peb tias ‘nyob hauv peb lub neej hauv peb lub cuab, hauv peb chaw ua hauj lwm, thiab hauv qhov chaw peb muab lub sij hawm rau, peb muaj cuab kav mloog, qhib siab dav thiab nrog sawv daws tsob hwb lub Moo Zoo tau.’ Vaj Qhia hais lo lus no los ntuas cov neeg ntseeg sawv daws.

Nyob hauv hnub no Vaj Qhia hais kom sawv daws muaj feem nrog lub Koom Txoos thiab lub sawm fem uas raug txov vim vaj huam tsis sib luag thiab raug cais ua ntau txheej ntau pawg.

Nyob hauv lub Moo Zoo, tsuas muaj ib tug mob ruas xwb thiaj rov los cav txog Tswv Ntuj ua Tswv Ntuj tsaug. Tus neeg no yog ib tug Xas Mas Lias, nws los cuag Huab Tais Yes Xus kom tau pib taug txoj kev ua tsaug. Yog li mas Vaj Qhia thiaj hais tias zaj no yog ib zaj zoo qhia peb sawv daws, vim tias muaj ntau zaus peb yuam kev mus poob hauv txoj kev qias, peb tsis nco txog kev npuab Tswv Ntuj. Kom peb nco tias kev ua tsaug, yuav pab kom peb ras tau tias Tswv Ntuj nyob hauv peb thiab nyob hauv lwm tus, nyob hauv peb lub cuab lub yim neeg. Yog li mas peb txhob hnov qab hais lo lus tias ‘ua tsaug’.

Hais txog ntawm ob tug Leej Ntshiab uas lub Koom Txoos tsa nyob hauv hnub no mas nkawd lub neej tsom txog qhov taug kev mus ua ke thiab muaj cuab kav ua tsaug lwm tus.

Nkawd cev tas lub neej pub rau lub Koom Txoos vim tias Leej Ntshiab Nkas Las Npis Nis hlub tshua cov neeg thoj nam thiab Leej Ntshiab Zas Tis yog tus saib xyuas cov neeg muaj mob.

Leej Ntshiab Nkas Las Npis Nis ntsia ntsoov lawm pem ntej, nyob hauv nws tsis muaj ib tug yuav yog lwm haiv neeg. Leej Ntshiab Zas Tis ua tus qauv hais txog paub ris txoj sia lub txiaj ntsig.

Yog li mas hnub no Vaj Qhia Fas Ntshis Kus thiaj caw tsoom neeg ntseeg sawv daws thov ob tug Leej Ntshiab tshiab no pab kom sawv daws taug kev mus ua ke tsis txhob muaj lub ntsa zeb ntsa tsua los cais sawv daws ua pab ua pawg, mas sawv daws thiaj yuav ua neeg paub pauj txiaj ntsha txiaj ntsig.