NYEEM KOJ LUB NEEJ CES KOJ YUAV NRHIAV TAU LEEJ PLEEV

Nyob hauv Hnub Plaub lub lis piam 29 caij Nyob Nruab Xyoo, Vaj Qhia Fas Ntshis Kus ntuas cov neeg ntseeg sawv daws kom lawv soj ntsuam lawv lub neej ces lawv yuav pom Huab Tais Yes Xus tus hneev taw nyob hauv lawv.

Vaj Qhia hais rau sawv daws tias “Peb lub neej yog phau ntawv muaj txiaj ntsim tshaj plaws uas Ntuj pub rau peb, yog ib phau ntawv cooj leej ntau tus tsis muaj hmoo tau coj los nyeem, los yog lig dhau rau lawv ua ntej lawv yuav tuag.”

Vaj Qhia nco txog cov lus Leej Ntshiab Aus Nkus tau cim xwm tseg tias nyob hauv nws lub neej, nws muab ntau lub xyoo los nrhiav Tswv Ntuj tab sis qhov kawg nws mam paub tias Tswv Ntuj nyob nraim hauv nws. Yog vim li no, nws thiaj hais tias ‘koj rov tig los tshuaj txog koj, ces koj yuav pom tias Qhov Tseeb nyob hauv koj.’

Vaj Qhia pom tias peb sawv daws nyiam thuam yus tus kheej thiab peb tsis nco pom tias Tswv Ntuj ua hauj lwm nyob hauv peb. Yog li thaum peb rov nyeem peb lub neej yav dhau los mas peb yuav txawj tso peb tus cuj pwm muaj taug pov tseg, thiab peb yuav txawj nrhiav lub ntsiab tob tob nyob hauv cov xwm tuaj nphav peb nyob hauv txhua hnub. Thaum zoo li no lawm, peb yuav txawj ntsia pom lwm yam, peb yuav txawj hwm tej yam tsis to taub yooj yim, peb yuav to taub txog txoj kev Tswv Ntuj ua hauj lwm nyob hauv peb.

Vaj Qhia Fas Ntshis Kus hais ntxiv tias txawm tias tej yam peb saib tsis tseem ceeb los yuav muaj peev xwm nthuav tau tej yam tob tob rau peb paub yog tias peb muab coj los xav coj los twm. Tej yam li hais no piv tau rau lub npliag hlaws Tswv Ntuj tau muab npom cia rau hauv peb.

“Qhov zoo raug npog cia, tsum maj mam ua tiag khawb thiaj yuav pom. Tswv Ntuj tsis yuam peb; xws li tej cua cawm siav. Peb niaj hnub nqus ua pa tab sis peb ntsia tsis pom, tab sis peb paub tias yog hnub twg tsis muaj cov pa cawm siav ces peb txoj sia kawg tu xwb.”

Vaj Qhia ntuas ntxiv tias yog peb yim nyeem peb lub neej ntau lwm mas peb yim yuav to taub zoo dua tuaj thiab peb yim yuav nrhiav tau Tswv Ntuj tes hauj lwm nyob hauv peb.

Kawg no Vaj Qhia taw kev rau sawv daws kom piav txog yus lub neej rau lwm tus mloog ces yus yuav nrhiav tau Tswv Ntuj nyob hauv yus.