ZAJ NYEEM NIAJ HNUB. Tim 1 lub 11 hli 2022 (Daily reflection)

ZAJ NYEEM HNUB TIM 1 LUB 11 HLI, HNUB UA HMOOV TSOOM LEEJ NTSHIAB
COV LUS NYOB HAUV MAS TAIS NTAWV MOO ZOO (MT 5: 1-12a)

Kwv tij Hmoob, hnub no lub Koom Txoos ua hmoov tsoom Leej Ntshiab. Nyob hauv tej lub teb chaws mas yuav ncua mus ua hmoov nyob hauv Hnub Chiv lub lis piam tom ntej. Tab sis nyob hauv cov teb chaws coj kev teev hawm Tswv Ntuj mas lawv yuav ua hmoov nyob hauv hnub no.
Ntawv Moo Zoo hnub no yog hais txog cov tau txoj hmoov zoo, los yog cov yuav tau mus nyob pem Ntuj Ceeb Tsheej. Cov ntawd yog cov peb hais tias lawv tau ua Leej Ntshiab nyob hauv lub Koom Txoos.
Kwv tij Hmoob, yog peb xav tau lub neej tshiab nyob pem Ntuj Ceeb Tsheej xws li tsoom Leej Ntshiab mas peb yuav ua neej ntshiab nyob hauv lub ntiaj teb no xws li Huab Tais Yes Xus cov lus hauv hnub no.
Peb yuav ua neeg pluag hauv nruab siab, muaj lub siab zoo, ua siab mos hlub tshua lwm tis, ua neeg ncaj, hlub luag tej, ua siab dawb huv, nyiam tsim kev thaj yeeb, nyiam ua qhov ncaj, thiab hwm Tswv Ntuj. Nyob zoo sawv daws.