ZAJ NYEEM NIAJ HNUB. Tim 5 lub 11 hlis 2022 (Daily reflection)

ZAJ NYEEM HNUB TIM 5 LUB 11 HLI, HNUB XYA LUB LIS PIAM 31 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 16: 9-15)

Kwv tij Hmoob sawv daws, nag hmo lub Moo Zoo hais txog tus tim xyoob xyuam xim, nws muab tus tswv nyiaj cov nyiaj siv lwj siv liam, ces tus tswv thiaj yuav muab nws rho tawm txoj hauj lwm saib xyuas tus tswv cov nyiaj. Lub Moo Zoo hnub no Huab Tais Yes Xus ntuas peb kom txhob ua xws li tus tim xyoob ntawd. Peb yuav tau ua neeg ncaj, ua neeg pheej xeeb saib yam Tswv Ntuj pub rau peb. 
Huab Tais Yes Xus hais ntxiv tias nyiaj txiag yuav ua kom peb tsis nco qab txog Tswv Ntuj, vim tias thaum peb saib nyiaj txiag ua qhov hlob, ces peb lub siab yuav xav ntsoov txog kev nrhiav nyiaj xwb, peb yuav xav tias yuav ua li cas thiaj nplua nuj, yuav ua li cas thiaj tsis poob peev, ces thaum ntawd peb yuav tsis nco qab txog kev ncaj ncees, peb yuav tsis ua neeg xyuam xim. 
Li ntawd mas kwv tij Hmoob sawv daws, txawm nej yuav khwv noj haus, ua hauj lwm los ua lag luam kom tau yug nej cev nqaij, tab sis peb ZOO TSWV ZOV YAJ xav kom nej nco txog Tswv Ntuj, ras txog cov kwv tij nyob npuag ncig nej, nej yuav hlub lawv, nej yuav qee ib feem pub rau lawv, nej yuav ua neeg pheej xeeb, nej txhob muab nyiaj tsiag saib ua nej tus tswv ntuj mog.
Nej yuav nco tias ‘yam uas neeg muab saib siab, mas yog ib yam phem tsiv saib kawg nyob ntawm Tswv Ntuj xub ntiag.’ Nyob zoo sawv daws.