ZAJ NYEEM NIAJ HNUB. Tim 7 lub 11 hlis 2022 (Daily reflection)

ZAJ NYEEM HNUB TIM 7 LUB 11 HLIS, HNUB OB LUB LIS PIAM 32 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 17: 1-6)

Kwv tij Hmoob sawv daws, lub Moo Zoo hnub no Huab Tais Yes Xus hais meej kawg tias ‘tus coj luag ua txhaum mas nws txoj hmoov phem’, thiab Huab Tais Yes Xus hais ntxiv tias ‘yog koj tus kwv ua txhaum mas koj yuav qhuab ntuas nws, yog nws thov txhaum mas koj yuav zam rau nws.’
Yog li mas kwv tij Hmoob, peb yog neeg ntseeg txog Yes Xus, peb yuav tsis txhob ua kom lwm tus neeg ntseeg tso tseg lawv txoj kev ntseeg los yog kev tso siab rau Tswv Ntuj. Tiam sis peb cov neeg ntseeg mas peb yuav sib pab ntuas cov kwv tij hauv txoj kev ntseeg thiab peb yuav sib zam, mas peb cov kwv tij txoj kev ntseeg thiaj yuav nyob ruaj.
Peb yuav ua tus qauv zoo cia rau cov kwv tij coj lwm txoj kev teev hawm pom tias peb cov neeg ntseeg mas peb txawj sib nyiam sib hlub, txawj sib pab sib nres, txawj sib qhuab sib zam, ces lawv thiaj tig los yuav siab tshiab tso siab rau Tswv Ntuj xws li peb mog. Nyob zoo sawv daws.