Lub tsev tshaj Ntuj Lus tshiab ntawm lub Cheeb Koom Txoos pib qhib txij hnub cov Tswv Qhia lub rooj sab laj tiav tas

Nyob hauv tuam ceeb Hanoi, lub tsev tshaj Ntuj Lus tshiab nyob hauv lub Cheeb Koom Txoos tau qhib raws txoj cai lawm. Yog lub tuam tsev 12 txheej siab thiab loj dav kawg. Yog qhov chaw nruab nrab ntawm lub Koom Txoos nyob Nyab Laj qaum teb.

Hnub tim 7 lub 10 hli no, tau ua cov kab ke qhib lub tuam tsev, vim yog lub hnub nyoog hais txoj Saw Mab Liab. Tom qab lub rooj sab laj cov Tswv Qhia zaum tim 15, mas cov Tswv Qhia sawv daws kuj tuaj koom ua cov kab ke qhib lub tuam tsev tshiab ntawd. Muaj tus Tswv Qhia Liab sawv Vaj Qhia cev nyob Nyab Laj teb hu ua Marek Zalewski tuaj koom thiab Muaj cov neeg ntseeg ntau txhiab leej tuaj koom.

Cov kab ke ntawd yog ua nyob hauv lub tsev teev Ntuj hwm Leej Ntshiab Yos Xes. Lub tsev tshaj Ntuj Lus yog qhov chaw sawv daws sib koom ua ib lub siab thiab ib yim neeg loj nyob hauv lub Cheeb Koom Txoos. Tswv Qhia Yos Xes Vu Van Thien nyob Hanoi, yog tus coj ib pawg neeg ntseeg coob coob li ntawm 350,000 leej.

Lub tuam tsev tshaj Ntuj Lus tshiab no, yuav yog qhov chaw sib koom ntawm cov neeg ntseeg nyob hauv lub Cheeb Koom Txoos, yuav ua qhov chaw sab laj thiab qhov chaw cov Txiv Plig tuaj so. Muaj ib chav tsev cia sab laj loj dav thiab muaj 400 lub rooj zaum, muaj chav saib ntawv thiab muaj chav pw li ntawm 200 chav tsev. Lub tuam tsev no yuav pab txhawb nqa kev txawj ntse thiab paub txog Huab Tais Yes Xus, kom sawv daws sib koom ua ib lub siab los tshaj Ntuj Lus rau ib zeej tsoom neeg.