Hnub Chiv Tim 30 Lub 10 Hlis 2022 (Sunday Homily)

Hnub Chiv Tim 30 Lub 10 Hlis 2022

Lub caij nyob nruab xyoo
Lus Kas 19:1-10

“Hnub no, txoj kev cawm los txog hauv lub tsev no, vim tus no kuj yog Has Nplas Has ib
leeg tub thiab. Vim tias Neeg Leej Tub tuaj nrhiav thiab tuaj cawm yam uas ploj lawm.”

Nyob zoo…

Ntawv Moo Zoo hnub no hais txog ib tug neeg lub npe hu ua Ntxas Kais, nws yog ib tug
nom hauv cov sau se. Cov sau se yog cov siab tsis ncaj. Cov Israel pom tias cov sau se
yog neeg txhaum, lawv thiaj tsis nyiam cov no. Thaum Huab Tais Yes Xus mus hauv
Ntxas Kais lub tsev, cov ntawd pom li ntawd, lawv tsis tsaus siab kawg.
Ua ntej Huab Tais Yes Xus mus tshaj lub Moo Zoo, nws hais kom tseeb tias nws tuaj
nrhiav cov neeg txhaum, nws tuaj nrhiav cov muaj mob. Hnub no nws kuj ua raws li nws
hais, nws kuj ua raws li nws siab xav, nws kuj ua raws li Leej Txiv lub siab nyiam.
Qhov uas peb pom hauv zaj no yog kev khuv leej ntawm Tswv Ntuj. Huab Tais Yes Xus
khuv leej cov neeg txhaum ib yam li Ntxas Kais thiab kev hloov siab tshiab ntawm Ntxas
Kais. Huab Tais Yes Xus hais kom sawv daws paub tias “Hnub no, txoj kev cawm los
txog hauv lub tsev no, vim tus no kuj yog Has Nplas Has ib leeg tub thiab. Vim tias
Neeg Leej Tub tuaj nrhiav thiab tuaj cawm yam uas ploj lawm.” “Txoj kev cawm los txog
hauv lub tsev no lawm” txhais tias Huab Tais Tswv Ntuj nrog tus no nyob lawm. Hnub
no, Tswv Ntuj foom hmoov zoo rau lub tsev no, lub yim neeg no lawm. Kuv ntseeg tias
peb sawv daws kuj xav li no thiab. Peb xav kom peb lub tsev los lub neej muaj kev
cawm, muaj kev kaj siab lug hauv yus lub siab lub plawv.
Ntxas Kais tsis hloov siab tshiab xwb, nws muab nws tej cuab yeej cuab tam ib nrab
pub rau cov pluag thiab. Nws tsis ncaj rau leej twg, mas nws yuav muab plaub npaug
pauj rau nws. Nws hloov siab tshiab thiab ua lub neej tshiab thiab. Kwv tij hmoob sawv
daws, hnub no Ntxas Kais yog tus piv ntxwv zoo rau peb, niaj hnub peb yuav tsum
hloov siab tshiab ntawm kev tsis zoo, kev txhaum thiab ua lub neej tshiab. Vim tias
hnub no Huab Tais Yes Xus mus so haub peb lub tsev lawm.
Nyob zoo sawv daws!