ZAJ NYEEM NIAJAHNUB. Tim 15 lub 11 hlis 2022 (Daily reflection)

ZAJ NYEEM HNUB TIM 15 LUB 11 HLIS, HNUB NCO TXOG LEEJ NTSHIAB AS NPAWS TUS LOJ
COV LUS NYOB HAUV LUS KAS NTAWV MOO ZOO (LK 19: 1-10)

Cov kwv tij Hmoob, zaj hais txog Ntxas Kais tau qhia peb tias thaum twg peb qhib tsev tos txais Huab Tais Yes Xus, ces peb lub tsev yuav tau kev cawm raws li Huab Tais Yes Xus lo lus tias “Hnub no, txoj kev cawm los txog hauv lub tsev no.”
Kwv tij Hmoob, peb lub siab lub tswv yim, yog peb lub tsev. Yog li mas thaum peb qhib siab txais Huab Tais Yes Xus ces Huab Tais Yes Xus yuav los hloov peb lub neej, kom peb txawj xaiv ua yam zoo xws li thaum Ntxas Kais qhib nws lub tsev uas yog nws lub siab lawm, nws pom txog qhov tsis zoo nws tau ua, nws hloov siab tshiab ces nws hais tias “Kuv yuav muab kuv tej cuab yeej cuab tam ib nrab pub rau cov pluag. Yog kuv tau ua tsis ncaj rau leej twg, mas kuv yuav muab 4 npaug pauj rau nws.”
Kwv tij Hmoob sawv daws, muaj ntau zaus hauv peb lub neej, peb txaj muaj, peb tsis kam qhib siab tos txais Huab Tais Yes Xus. Hnub no xav kom peb sawv daws ua xws li Ntxas Kais, nrhiav kom tau pom Huab Tais Yes Xus, mloog saib Huab Tais Yes Xus hais dab tsi rau peb, nrog Huab Tais Yes Xus sib txuas lus, thiab cia Huab Tais Yes Xus los nyob hauv peb.