Hnub Chiv Tim 13 Lub 11 Hlis 2022 (Sunday Homily)

Hnub Chiv Tim 13 Lub 11 Hlis 2022
Lub caij nyob nruab xyoo
Lus Kas 21:5-19

“luag yuav ntxub nej vim kuv lub npe. Tab sis tsis muaj ib txoj plaub hau saum nej taub hau yuav ploj. Nej ua siab ruaj kom tom thawj, ces nej yuav cawm nej txoj sia.”
Nyob zoo…
Kwv tij hmoob sawv daws, thaum peb mloog Ntawv Moo zoo hnub no tas, peb yuav xav tias Huab Tais Yes Xus hais txog hnub ntiaj teb kawg nyob ze lawm, “ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws. Lub ntiaj teb yuav qeeg heev kawg. Nyob rau ntau qhov chaw yuav muaj mob aws, thiab muaj kev tshaib. Yuav muaj tej yam xwm txaus ntshai kawg” peb hnov li no tej zaus ua rau peb ntshai tshaj li. Hnub ntiaj teb kawg yuav los txog tiag tiag, tab sis mas peb tseem tsis paub yuav los txog qhov twg. Txhob ntshai dhau. Txawm li ntawd los, qhov uas peb yuav tsum ntsia kom meej yog lub ntsiab hauv zaj no. 
 Huab Tais Yes Xus hais tias lub Tuam Tsev teev Ntuj yuav raug xwv txheej. Nws hais tias “muaj ib hnub luag yuav rhuav tsis tseg ob lub pob zeb txhim sib tshooj sawv ntsug.” Lus Kas xav hais kom tseeb tias tib neeg kev vam meej thiab kev loj hlob tsis nyob mus ib txhiab ib txhis. lub Tuam Tsev teev Ntuj yog lub cim ntawm cov Israel kev vam meej. Tab sis mas, muaj ib hnub yuav raug cov Roman rhuav ploj tas. Thaum cov thwj tim tab tom qhuas txog lub Tuam Tsev Teev Ntuj txhum tau pob zeb zoo nkauj rau thiab muaj paj tshab txi Ntuj zoo saib, Huab Tais Yes Xus qhia lawv kom tig los ntsia cov plug txom nyem thiab cov poj ntsuam hauv lub Tuam Tsev Teev Ntuj, tsis yog ntsia ntawm yam uas tib neeg txhim tuaj xwb. Zaj ua ntej Huab Tais Xes Xus qhia cov thwj tim txog tus poj ntsuam pluag pub nyiaj ntau tshaj neeg nplua nuj hauv lub Tuam Tsev Teev Ntuj. Nws pub ntau tshaj sawv daws huv tib si. Vim tias cov npua nuj lawv rho lawv cov nyiaj seem los pub ua paj tshab, tab sis tus poj ntsuam rho nyiaj hauv nws txoj kev pluag. Nws muab tas nws lub cuab tam los tso rau hauv. Yes Xus qhia kom lawv pom qhov no. 
Tsis tas li ntawd, hauv zaj no, Lus Kas qhia kom cov neeg ntseeg paub tias txhob pom tsuas hnub ntiaj teb kawg los txhua yam uas neeg tsim tseg los lub koom haum uas neeg tsim tseg xwb, tab sis yus yuav tsum pom cov kwv tij neeg tsa txom txom nyem hauv yus zej zoj thiab. Yus saib xyuas cov neeg pluag tau koj vim tias peb ua yam no hauv txoj kev ntseeg txog Tswv Ntuj, yus cia siab rau Tswv Ntuj, yus thiaj ua tau. Txawm yog muaj kev txom nyem los kev kub ntxhov tshwm sim tuaj, yus kuj yeej tau, yus kuj tseem ua siab loj, poob tsis tau. “luag yuav ntxub nej vim kuv lub npe. Tab sis tsis muaj ib txoj plaub hau saum nej taub hau yuav ploj. Nej ua siab ruaj kom tom thawj, ces nej yuav cawm nej txoj sia.”