ZAJ NYEEM NIAJAHNUB. Tim 22 lub 11 hli 2022 (Daily reflection)

ZAJ NYEEM HNUB TIM 22 LUB 11 HLIS, HNUB NCO TXOG LEEJ NTSHIAB XES XIS LIAS
COV LUS NYOB HAUV LUS KAS NTAWV MOO ZOO (LK 21: 5-11)

Cov kwv tij Hmoob, Huab Tais Yes Xus hais tias lub Tuam Tsev Teev Ntuj nyob Yes Lus Xas Les uas sawv daws cav tias zoo nkauj ntawd, muaj ib hnub yuav raug rhuav pov tseg. Raws li cov Yus Das liv xwm mas pom tias tsis ntev tom qab lub Tuam Tsev Teev Ntuj raug cov Los Mas rhuav tiag.

Hnub no peb xav tham me ntsis tias nyob hauv Huab Tais Yes Xus cov lus no puas muaj tej yam tob tob zais cia.

Yog peb muab lub Tuam Tsev Teev Ntuj piv rau ntiaj teb neeg lub neej, mas peb pom tias muaj ib txhia lub neej tau zoo, lawv muaj suab npe mus txog twg los sawv daws qhuas txog. Qhov no mas yog yam sawv daws vam vam txog.

Tab sis yog peb qaug qav rau tej lus qhuas lus cav ntawd, peb tsis ceev faj ces yuav ua rau peb poob hauv txoj kev ua txhaum. Thaum kawg peb lub neej yuav puas ntsoog tas xws li lub Tuam Tsev Teev Ntuj hauv Yes Lus Xas Les.

Yog peb tsis xav kom peb lub neej, txoj sia, tus plig raug rhuav mas peb yuav taug Tswv Ntuj txoj kev, ntsia peb txoj sia xws li Huab Tais Yes Xus ntsia, peb yuav ntsia kom pom tias yuav ua li cas peb tus plig thiaj tsis raug rhuav pov tseg.

Cov kwv tij, tsis yog peb yuav ua kom peb tus plig txhob raug rhuav xwb, peb yuav tau pab kom lwm tus txhob raug rhuav thiab, xws li Leej Ntshiab Xes Xis Lias tus Leej Ntshiab hauv hnub no tau ua.

Xes Xis Lias pom tias kawg txoj kev ntseeg txog Yes Xus xwb thiaj yuav cawm tau nws tus plig kom mus txog Ntuj Ceeb Tsheej tau, ces nws thiaj qhia txoj hau kev no rau tus txiv neej lawv muab qhaib rau nws, yog Vas Les Lis As. Xes Xis Lias qhia kom Vas Les Lis As mus kawm kev ntseeg ces tom qab no Vas Les Lis As txais Cim Ntxuav tig los ua neeg ntseeg xws li Xes Xis Lias. Txawm tias qhov kawg Vas Les Lis As raug cov nom Los Mas muab tua tuag, tsis kav Xes Xis Lias tsis tso nws txoj kev ntseeg pov tseg, nws tseem zoo siab hlo tawm mus qhia txoj kev ntseeg raws zej zos kom sawv daws tus plig tau kev cawm, thiab Xes Xis Lias txaus siab tuag ua tim khawv txog txoj kev nws xaiv, vim nws paub tias txawm nws txoj sia rau txo, tab sis nws tus ntsuj plig tau txais txoj sia tshiab nyob mus li lawm. Nws zoo li lub Tuam Tsev tsis muaj leej twg yuav rhuav tau. Nyob zoo sawv daws.