Kev nplij siab tseeb tiag zeem tseeb tias peb tab tom ua xis Tswv Ntuj siab

Hnub tim 30 lub 11 hlis tas los no, Vaj Qhia Fas Ntshis Kus rov tuaj qhia Ntuj kev cai rau cov neeg ntseeg sawv daws txog ‘kev nplij siab nyob hauv kev ntsuas paub’. Vaj Qhia pib tias peb yuav paub kev nplij siab kom tseeb tau mas tsum xyaum kawm raws li Leej Ntshiab Los Yos Las tau qhia; yog soj ntsuam peb kev xav txij thaum pib mus txog thaum xaus saib pheeb mus rau qhov zoo los phem. Yog pheeb mus rau sab zoo mas yog ib lub cim zoo tuaj ntawm cov Tshiab tuaj. Tej lub tswv yim tsis zoo tshwm tuaj cuam tshuam nyob hauv peb txoj kev xav, los yog tuaj looj koov peb lub siab kom fab nyob tsis tus, mas yog yam tuaj ntawm tus dab phem tuaj.

Vaj Qhia hais ua piv txwv txog kev teev Ntuj tias yuav yog qhov zoo yog tias thaum pib teev Ntuj ntawd tau rub peb kom mus nyob hauv kev nyiam Ntuj thiab hlub lwm tus; tab sis kuj yuav yog qhov phem, yog tias peb teev Ntuj kom txhob tau leg peb txoj kab xwm. Yog tias kev teev Ntuj ua rau peb muab hlob saib tsis taus lwm tus, mas txoj hauj lwm zoo no kuj yuav txias ua qhov phem.

Qhov tom qab mas yog peb nug saib qhov xaus hauv yam peb xav los yog tau ua ntawd, puas txi tau lub txiv zoo los phem, puas coj peb khiav tawm hauv cov hauj lwm peb tsim nyog ua, puas ua rau peb siab heev thiab npau siab, los puas ua rau peb tsom txog tus kheej ntau dua muab siab khi rau Tswv Ntuj.

Vaj Qhia xam pom tias neeg tus ntsuj tus yeeb ncuab yog tus txawj dag, nws nrhiav kev nkag mus txog hauv peb nruab siab kom tau lwg peb lub tswv yim thiab hauj lwm. Yog li, kev soj ntsuam txog lub keeb chiv peb zaj tswv yim thiab qhov tseeb hauv peb zaj tswv yim thiaj yog qhov ‘cheem tsum yuav tsum muaj’.

Raws li tau hais los no, kev ntsuas pom kom paub txog yam zoo thiab phem thiaj yog qhov tseem ceeb nyob hauv niaj hnub no. Yog yam muaj nuj nqis rau peb yog peb rov tig ntsia txog cov swm peb tau hla dhau los.

Kev ras pom txog tej yam tsheej xeeb tuaj yog qhov tseem ceeb, yog lub cim tias Tswv Ntuj lub txiaj ntsim tab tom ua hauj lwm nyob hauv peb, pab kom peb loj hlob nyob hauv kev twj lij thiab ras txog.

Vaj Qhia ntxiv lus tias kev nplij siab tseeb tiag yuav yog qhov zeem tseeb tau tias peb tab tom ua raws li Tswv Ntuj nyiam, ua xis Tswv Ntuj siab, peb nyob hauv txoj kev yog lawm.

Kawg no, Vaj Qhia ntuas tias kev ntsuas paub tsis yog hais txog yam zoo los yam zoo tshaj plaws xwb, tiam sis yog hais txog yam zoo rau kuv nyob ntawm no, ziag no thiab. Kev ntsuas paub pab peb kom pom tias Tswv Ntuj vam txog dab tsi ntawm peb nyob rau lub zim txwv no, pab peb kom xaiv tau qhov zoo tiag.

Vam txog: https://www.vaticannews.va/en/pope/news/2022-11/pope-francis-general-audience-catechesis-discernment-consolation.html
Tus txhais: Txawj Tsav M. Lauj