Hnub Chiv Tim 11 Lub 12 Hlis 2022 (Sunday Homily)

Hnub Chiv Tim 11 Lub 12 Hlis 2022
Lub caij Tos Huab Tais Yes Xus
Mas Tais: 11:2-11

“Koj puas yog tus yuav tuaj? Los peb tseem yuav tos dua lwm tus?”

Nyob zoo…
Kwv tij sawv daws, Ntawv Moo Zoo hnub no qhia txog Zam Ntxuav Plig xa nws ib co thwj tim tuaj nug Yes Xus. Nws xav paub kom meej kom tseem tias Yes Xus yog Leej Pleev tiag tiag! Thaum Zam cov thwj tim nug Yes Xus tias “Koj puas yog tus yuav tuaj?,” Huab Tais Yes Xus tsis teb lawv ncaj qha tias “nws yog Leej Pleev” los nws yog Tswv Ntuj los nws yog leej twg. Tab sis mas, nws teb tias “Nej rov mus qhia qhov nej hnov thiab qhov nej pom rau Zam: cov dig muag rov pom kev, cov ceg tawv mus taus kev, cov mob ruas rov huv lawm, cov lag ntseg hnov lus, cov tuag sawv rov los, cov pluag tau hnov lub Moo Zoo lawm.” Huab Tais Yes Xus tsis teb ncaj qha tab sis mas nws piav qhia txog cov hauj lwm nws twb ua. Lub sij hawm nws los txog, cov dig muag kuj rov pom kev, cov ceg tawv kuj mus taus kev tau, cov mob ruas kuj  rov huv lawm, cov lag ntseg hnov lus, cov tuag kuj sawv rov los, cov pluag tau hnov lub Moo Zoo lawm. Cov no yog tej hauj lwm, yog lub cim piav txog Leej Pleev. Cov no yog tej hauj lwm ntawm Leej Pleev uas cov yaj saub hauv Ntawv Ntshiab Cog Lus Qub nyias hais txog.
Ntawm peb cov ntseeg kuj ib yam li thiab. Ntau zaus, tsis tsim nyog uas yus yuav tsum tshaj tawm rau sawv daws paub tias yus yog leej twg, yus ua dab tsi, yus muaj suab npe li cas, yus muaj koob meej li cas. Tab sis tsim nyog uas yus yuav tsum uas neej kom sawv daws paub tias yus yog Huab Tais Yes Xus cov thwj tim. Thaum luag saib yus lub neej thiab qhov uas yus twb ua, lawv yuav paub tias yus yuav leej twg, yus yog Huab Tais Yes Xus cov thwj tim los tsis yog. Qhov tseeb yog yus lub neej, yus ua qhov zoo, qhov ncaj ncees, tsis yog cov lus qhuas txog yus tus kheej xwb.
Huav lub Caij Tos Huab Tais Yes Xus no, peb yuav tsum rov ntsia ntawm yus lub neej tshaj dua ntsia ntawm luag tej li. Peb npaj peb lub neej tos txais Huab Tais Yes Xus los cawm peb ntawm peb kev txhaum, kev tsis zoo, tsis yog luag tej kev txhaum. Thov kom Huab Tais Yes Xus cov lus qhia hnub no ua rau peb pom meej tias yus yuav npaj yus lub neej zoo li cas. Kev ua muaj zog dua lo lus hais. 

Ua tiag ntxeem kom dhau
Ua tiag nyiaj
Ua tiag uv

Ntuj lub Ceeb Tsheej raug luag sib txeeb: cov neeg siab ceev txeeb lub Ceeb Tsheej.