Tswv Ntuj muaj peev xwm ntxeev cov xwv txheej loj kom ua lub ntuj tshiab rau peb

Hnub tim 18 lub 12 hlis xyoo 2022 no, Vaj Qhia Fas Ntshis Kus twm txog Leej Ntshiab Yos Xes kev txais tus Cawm Seej, thiab ntuas tias Tswv Ntuj muaj peev xwm ntxeev lub caij nyuaj tshaj plaws hauv peb lub neej kom ua tau lub cib fim cia rau peb pib dua tshiab.

Lub Moo Zoo hauv Hnub Chiv lub Lis Piam 4 caij Tos Huab Tais yog cov lus nyob hauv Mas Tais Ntawv Moo Zoo (MT 1: 18-24) yog hais txog Tswv Ntuj tus Tshiab los hais rau Yos Xes hauv npau suav kom coj Mab Liab los ua nws poj niam. Vaj Qhia nthuav zaj no tias tus txiv neej yuav los ua Yes Xus txiv qhuav mas tej zaus nws txoj kev npau suav tsuas yog tias yuav tsim lub neej tshiab thiab tsa lub cuab muaj tus poj niam ntxim hlub, muaj cov me nyuam mloog lus, thiab tau txoj hauj lwm muaj tsim xwb. Tiam sis nws pom tias Mab Liab tab tom xeeb tub rau hauv lub cev, tus me nyuam ntawd tsis yog nws li, ces Yos Xes poob siab, lwj siab, ntxov siab, los tej zaus nws yuav meem txom thiab tu siab.

Thaum Yos Xes pom tias tej ntawd ua rau nws qhov npau suav thiab nws lub ntuj tawg puas ntsoog tas, ces raws Mais Xes txoj cai tsuas muaj 2 txoj hauv kev rau nws taug xwb; liam tias Mab Liab deev hluas, los yuav nrauj Mab Liab ntsiag ntsiag kom Mab Liab txhob raug teeb meem phem. Yos Xes yuav tau xaiv ua li no mas nws thiaj tsis poob ntsej muag.

Yos Xes tau xaiv txoj hauv kev nrauj Mab Liab ntsiag ntsiag vim yog txoj kev khuv leej dua lwm txoj.

Vaj Qhia nthuav ntxiv tias thaum Yos Xes ntsib xwv txheej loj, nws tab tom xav thiab yuav txiav txim siab li ntawd, ces Tswv Ntuj tsom kev kaj rau nws lub siab – Tswv Ntuj hais rau Yos Xes hauv npau suav tias Mab Liab tsis tau deev hluas, tiam sis yog Leej Ntuj Plig Ntshiab ua kom Mab Liab xeeb tub, tus yuav yug los ntawd yog tus Cawm Seej.

Thaum Yos Xes sawv, nws paub tias Tswv Ntuj tab tom ntxiv txoj kev npau suav rau nws, yog cov txiv neej His Xas Lais kev npau suav; tau ua tus Cawm Seej leej txiv.

Thaum zoo li ntawd, Yos Xes paub tias nws yuav tsum tau cais nws lub neej no rau Tswv Ntuj, yog zoo siab tos Mab Liab thiab nws Leej Tub los nyob hauv nws tsev txawv li qhov nws npau suav txog. Yos Xes yuav tau tso nws qhov npau suav nws ntshaw tseg, nws yuav tso siab rau Tswv Ntuj thiab ua raws li Tswv Ntuj yuav hais rau nws. Nws txoj sia yuav tsis zoo li yav tas los lawm.

Vaj Qhia tig los hais rau sawv daws tias sawv daws tau dab tsi hauv lub Moo Zoo hnub no.

Pom tau tias nyob hauv sawv daws, nyias muaj nyias txoj npau suav, nyias muaj nyias lub hom phiaj yuav mus kom txog. Tej zaus sawv daws kuj yuav mus tsis txog lub hom phiaj, lub neej tsis zoo li npau suav.

Hnub no Leej Ntshiab Yos Xes tau qhia peb tias yuav ua li cas thiaj yuav nkag siab txog qhov xwm tsis mus raws li lub siab ntshaw ntawd.

Thaum peb tsis tau li npau suav, peb tsis txhob cia tus kheej poob rau lub tswv yim tsaus ntuj. Qhov peb yuav ua mas yog tos ntsoov saib yuav muaj xwm dab tsi tshwm sim tuaj ua rau peb xav tsis txog.

Txawm tias yog lub caij muaj xwv txheej, los peb yuav maj mam tshau peb lub tswv yim, ua zoo xav, txhob maj txiav txim siab.

Vaj Qhia hais cov lus ntuas kawg tias “Thaum peb ntsib xwv txheej, peb qhib qhov rooj cia Tswv Ntuj los nyob hauv peb, Tswv Ntuj yuav pab peb nrhiav kev tawm. Tswv Ntuj ntxeev cov xwv txheej loj kom ua ib lub cib fim zoo rau peb, txawm tias yuav tsis mus li peb kev xav, tiam sis yog txoj hauv kev Tswv Ntuj paub. Yog lub ntuj tshiab loj thiab zoo nkauj dua rau peb.”

Tus txhais: Txawj Tsav M. Lauj

Vam txog: https://www.vaticannews.va/en/pope/news/2022-12/pope-francis-angelus-4th...