Hnub Chiv Tim 25 Lub 12 Hlis 2022 (Sunday Homily)

Hnub Chiv Tim 25 Lub 12 Hlis 2022
Lub caij Yes Xus Yug Los
Zam 1:1-5, 9-12

“Thaum lub hauv paus, Leej Lo Lus yeej nyob txawm lawm. Leej Lo Lus nyob ze Tswv Ntuj. Leej Lo Lus yog Tswv Ntuj.”

Cov kwv tij zoo nyiam, Zam Ntawv Moo Zoo pib qhia txog Yes Xus lub neej thaum lub hauv puas, tsis yog thaum Mab Liab xeeb tub nws. Hauv Zam Ntawv Moo Zoo, tsis muaj Huab Tais tus tshiab, tsis muaj cov tshiab, tsis muaj cov zov yaj, tsis muaj cov nyuj cov yaj los lwm yam uas yuav cuam tshuam peb. Zam ua rau peb muab siab rau qhov tseem ceeb tshaj plaws uas yog Leej Tub, Huab Tais Yes Xus. Zam qhia tias “Thaum lub hauv paus, Leej Lo Lus yeej nyob txawm lawm. Leej Lo Lus nyob ze Tswv Ntuj. Leej Lo Lus yog Tswv Ntuj.” Tas ib puas tsav yam tshwm los vim nws. Yog tsis muaj nws, mas tsis muaj ib yam dab tsi tshwm tau los nyob.
Cov kwv tij Hmoob, qhov tseem ceeb tshaj plaws yog rau qhov hais tias Huab Tais Tswv Ntuj, tus tsim lub sim ceeb thiab tas puas tsav yam, xeeb los ua neeg lawm. Nws lub npe hu uas “Yes Xus.” Nws los nyob hauv nruab nrab peb lawm. Nws nrog peb nyob lawm. Txoj sia xeeb txawm nyob hauv nws. Txoj sia yog neeg qhov pom kev. Ces qhov pom kev ci hauv qhov tsaus ntuj, qhov tsaus ntuj thaiv tsis tau qhov pom kev. 
Zam hais txog “qhov pom kev” thiab “qhov tsaus ntuj.” Qhov pom kev ci hauv qhov tsaus ntuj, qhov tsaus ntuj thaiv tsis tau qhov pom kev. Huab Tais Yes Xus yog qhov pom kev loj tshaj plaws ua rau peb yeej tau qhov tsaus ntuj uas yog kev txhaum, kev phem kev tsis zoo. Kuv xav tias tsis muaj leej twg xav ua neej nyob hauv txoj kev tsaus ntuj nti, puas yog? Sawv daws txhua leej txhua tus xav taug kev hauv txoj kev uas muaj qhov pom kev coj peb mus txog Tswv Ntuj, qhov pom kev uas coj peb mus nyob ntawm Tswv Ntuj xub ntiag. Ua li ntawd, mas qhov pom kev ntawd hnub no peb ntsib lawm, hnub no peb nhriav tau lawm. Qhov pom kev no yog Huab Tais Yes Xus mog!
Cov kwv tij Hmoob, niaj hnub no Huab Tais Yes Xus tiam neeg twb dhau los law mob txhiab tawm xyoo, tsis kav Huab Tais Yes Xus tseem niaj hnub nrog peb nyob nraim. Nws nyob hauv peb, nyob hauv cov neeg txom nyem peb pom peb ntsib tom tej tog kev. Huab Tais Yes Xus niaj hnub hais lus rau peb, ntuas peb kom tig los ua neej nyob hauv qhov pom kev, vim tias Huab Tais Yes Xus ua lub teeb ci tuaj rau lub qab ntuj neeg, ces tus twg txais Huab Tais Yes Xus, tus twg mloog Leej Lo Lus mas tus ntawd thiaj yuav nyob hauv qhov pom kev, yuav ua Tswv Ntuj cov me nyuam.
Thov kom peb cov kwv tij Hmoob tso tseg lub neej tsaus ntuj nti, los nyob hauv Tswv Ntuj qhov pom kev, txais Huab Tais Yes Xus los ua lub teeb tsom kev nyob hauv lub xyoo tshiab 2023 tab tom tuaj yuav txog no mog. Nyob zoo sawv daws.