Hnub Chiv Tim 1 Lub 1 Hlis 2023 (Sunday Homily)

Hnub Chiv Tim 1 Lub 1 Hlis 2023
Lub caij Yes Xus Yug Los
Lus Kas 2:16-21

“Hos Mab Liab, nws ua tib zoo khaws tej lus no huv si cia rau nruab siab.”
Kwv tij sawv daws, hnub no peb ua hmoov txog Niam Mab Liab, Tswv Ntuj Leej Niam. Lub Koom Txoos Kas Tos Liv hwm Niam Mab Liab vim tias nws yog Tswv Ntuj Leej Niam. Nws yog tus saib xyuas tus me nyuam Yes Xus, nws qhia ntau yam zoo rau Yes Xus. Yes Xus hlob tuaj ua neeg ncaj ncees kuj vim tias Mab Liab yog ib tug neeg tseem ceeb tshaj plaws hauv Tswv Ntuj txoj kev cawm neeg. 
Peb hu Niam Mab Liab Tswv Ntuj Leej Niam los “Theotokos” kuj vim rau qhov hais tias Mab Liab yog Huab Tais Yes Xus leej niam. Thiab Huab Tais Yes Xus yog Tswv Ntuj. Huab Tais Yes Xus yog Tswv Ntuj thiab tib neeg zoo li peb. Vim li ntawd mas hauv rooj sab laj loj ntawm Ephesus xyoo 431, lub Koom Txoos tshaj tawm tias Mab Liab yog Tswv Ntuj Leej Niam. Qhov no yog peb txoj kev ntseeg tseem ceeb tshaj.
Kev ua Tswv Ntuj Leej Niam tsis yoog yim. Tej zaus peb xav tias kev ua Tswv Ntuj Leej Niam yog ib qhov tshwj xwb tshaj vim tias Tswv Ntuj foom hmoov zoo rau nws, nws muaj lub txiaj ntsim ntau yam. Tab sim mas, peb tsis paub tias kev ua Tswv Ntuj Leej Niam ntawm Niam Mab Liab tsis yoog yim kiag li. Nws raug kev txom nyem ntau yam. Nws txoj kev txom nyem yog qhov hais tias, nws yuav tsum xeeb tub tab sis mas nws tsis tau yuav tus txiv. Nws yuav tsum coj Yes Xus khiav mus ntawm Hais Nkws Tos teb, nws yuav tsum zov thiab pov hwm tus me nyuam. Nws yuav tsum pom nws tus tub raug kev txom nyem loj thiab tuag saum ntoo cuam thiab ntau yam txom nyem. Hauv nruab siab, nws mob siab kawg, tab sis mas, qhov no yog Tswv Ntuj lub siab nyiam kom tshwm sim tuaj. Nws yog Tswv Ntuj tus ntxhais txib, nws thiaj li xav kom ua xis Tswv Ntuj siab. Ntau zaus, nws tsis nkag siab Tswv Ntuj tab tom ua dab tsi. “Hos Mab Liab, nws ua tib zoo khaws tej lus no huv si cia rau nruab siab.”
Tsis yog Huab Tais Yes Xus Leej Niam xwb, Niam Mab Liab yog peb sawv daws leej niam thiab. Thov cov ntseeg sawv daws ua lub neej raws li niam Mab Liab. Nws yog peb tus piv ntxwv hauv txoj kev ntseeg. Kom peb paub tias hauv txoj kev ntseeg, tsis yoog yim, muaj kev kub ntxhov, kev txom nyem ntau yam, tab sis mas peb kuj yeej tau vim tias Tswv Ntuj nrog nraim peb, peb muaj Tswv Ntuj lub hwj chim, peb thiaj yeej tau kev ntxias thiab kev phem tas huv si.