Hnub Chiv Tim 8 Lub 1 Hlis 2023 (Sunday Homily)

Hnub Chiv Tim 8 Lub 1 Hlis 2023
Lub caij Yes Xus Yug Los
Mas Tais 2:1-12
“lawv pom tus me nyuam thiab nws niam Mab Liab, lawv pe, lawv hawm nws. Lawv qhib lawv cov phij xab, lawv cev kub, cev txab ntoo xyab, thiab cev txab txiv yoov ua paj tshab rau nws.”

Hnub chiv no yog hnub hwm Leej Pleev tawm tuaj. Lo lus “tawm tuaj” muaj lub ntsiab tseem ceeb tshaj. Tawm tuaj los Epiphany txhais tias kev tshwm sim, kev ua kom paub. Ua li ntawd, mas hnub chiv hwm Leej Pleev tawm tuaj kuj txhais tias peb ua hmoov txog hnub me nyuam Yes Xus tawm tuaj rau sawv daws paub tias txoj kev cawm uas Tswv Ntuj tau cog lus tau tshwm sim tuaj lawm. Puag thaum ub, peb tsis paub Tswv Ntuj yog leej twg, Tswv Ntuj xav li cas, Tswv Ntuj hais li cas, Tswv Ntuj ua li cas, Tswv Ntuj muaj lub siab xav li cas. Hnub no, kev to taub nyuaj los kev tsis paub txog Tswv Ntuj, los mystery of God tau qhia rau peb paub lawm. 
Hauv Ntawv Moo Zoo hnub no, peb hnov Mas Tais qhia txog cov kws hnub qub tuaj Toob Fab tuaj hawm me nyuam Yes Xus. Hauv Mas Tais Ntawv Moo Zoo xwb uas hais txog cov kws hnub qub. Cov kws hnub qub sawv cev lub qab ntuj neeg. Ua li ntawd mas qhov no yog ib qhov tseem ceeb xav hais tias me nyuam Yes Xus yog tus vaj loj tshaj plaws yug los kav lub sim ceeb. Ua li ntawd mas, qhov tseem ceeb tshaj plaws hauv hnub no tsis yog 3 tug kws hnub qub, tab sis mas, yog tus me nyuam Yes Xus. Thov sawv daws to taub kom meej mog. 
Cov kws hnub qub muab paj tshaj 3 yam rau tus me nyuam. Muaj kub, txab ntoo xyab, thiab txab txiv yoov. Paj tshaj 3 peb yam no muaj lub ntsiab tseem ceeb hais txog tus me nyuam. Kub muaj lub ntsiab hais txog kev ua vaj ntawm Yes Xus peb tus Huab Tais, txab ntoo xyab txhais tias Tswv Ntuj nrog nraim peb los Tswv Ntuj nrog peb nyob ib yam li pa ncho ntawm txab ntoo xyab hauv thaj txi Ntuj. Thaib txab txiv yoov muaj lub ntsiab hais txog Huab Tais Yes Xus kev txom nyem loj thiab kev tuag hauv txoj kev cawm neeg. 
Hais txog ntawm no, kuv vam tias peb cov ntseeg sawv daws yuav nkag siab me ntsis txog peb txoj kev ntseeg. Thaum yus to taub kom meej yus txoj kev ntseeg, yus kuj yuav nyiam Tswv Ntuj tshaj dua, yus paub tias yus txoj kev ntseeg muaj lub ntsiab tseem ceeb hauv yus lub neej. Tswv Ntuj yog tus tseem ceeb tshaj plaws hauv yus lub neej. Thov peb sawv daws noj qab nyob zoo mog!