Zaj nyeem niaj hnub tim 9 lub 1 hlis 2023 (Daily reflection)

ZAJ NYEEM HNUB TIM 9 LUB 1 HLIS 2023, HNUB UA HMOOV YES XUS TXAIS LUB CIM NTXUAV
COV LUS NYOB HAUV MAS TAIS NTAWV MOO ZOO (MT 3: 13-17)

Cov kwv tij Hmoob sawv daws, hnub no yog hnub lub Koom Txoos ua hmoov Yes Xus txais lub Cim Ntxuav, yog thaum tus ntxuav plig Zam tshaj tias Tswv Ntuj lub Ceeb Tsheej tuaj txog ze lawm, kom sawv daws hloov siab tshiab los ntxuav lub cev hauv tus dej Yos Las Das. Thaum ntawd Yes Xus kuj tuaj thiab, nws tuaj ua kab ke ntxuav xws li zeej tsoom.
Leej Ntuj Plig qhia Zam kom paub tias Yes Xus yog tus tsis lo neeg lub keeb txhaun, yog tus yuav ntxuav tas ntiaj teb neeg cov txhaum, Zam thiaj hais tias “kuv yog tus yuav tsun thov koj ntxuav kuv.”
Kwv tij Hmoob, zoo li tus ntxuav plig Zam hais tias, Huab Tais Yes Xus yog Tswv Ntuj Leej Tub, nws tsis muaj txhaum. Huab Tais Yes Xus tsis yuav cia Zam ua kab ke ntxuav rau nws, tab sis vim Huab Tais Yes Xus xav kom cov ntseeg txog nws saib txoj kab ke ntxuav no yog lub cim pib nws txoj hauj lwm cawm ntiaj teb neeg. 
Txoj kev cawm no tsis yog Huab Tais Yes Xus tib leeg txoj hauj lwm xwb, tiam sis yog Peb Leeg Huab Tais txoj hauj lwm raws li tus ntxuav plig Zam ua tim khawv tias nws pom Tswv Ntuj Leej Ntuj Plig nqes xws li tus nquab los rau saum Yes Xus, nws hnov Leej Txiv Tswv Ntuj lub suab nrov saum ntuj tuaj tias ‘tus no yog kuv Leej Tub uas kuv nyiam, nws yog kuv qhov chaw zoo siab’. 
Yog li mas kwv tij Hmoob sawv daws, lub Koom Txoos pom tias lub sij hawm Huab Tais Yes Xus txais lub Cim Nxuav no yog tej xwm muaj qab hau kawg nkaus li, ces Koom Txoos thiaj ua hmoov hnub Huab Tais Yes Xus txais lub Cim Ntxuav, thiab cov tau txais lub Cim Ntxuav lawm, lawv thiaj yuav tsum nrog Huab Tais Yes Xus ua txoj hauj lwm cawm ntiaj teb neeg.
Nyob zoo sawv daws.