Hnub Chiv Tim 29 Lub 1 Hlis 2023 (Sunday Homily)

Hnub Chiv Tim 29 Lub 1 Hlis 2023
Lub caij Nyob Nruab Xyoo
Mas Tais 5: 1-12
“Thaum luag thuam nej, hiam nej, thiab liam ntau yam pehm rau nej vim kuv, mas nej txoj hmoov zoo.”

Kwv tij phoj ywg sawv daws, hauv Ntawv Moo Zoo hnub no, peb hnov Huab Tais Yes Xus qhia tsoom sid txog “txoj hmoov zoo,” “the Beatitudes” los “Sermon on the Mount.”
 Thaum Huab Tais Yes Xus pib txoj hauj lwm tshaj Tswv Ntuj lub Moo Zoo, nws tshaj tawm txog Tswv Ntuj lub Ceeb Tsheej rau pej xwm paub, nws tshaj tawm tias “Nej hloov siab mog, vim Ntuj lub Ceeb Tsheej los txog ze lawm.” Nws ua li no lo no ces, Huab Tais Yes Xus hu thawj plaub leeg thwj tim. Tsis tas li ntawd, Huab Tais Yes Xus qhia kom nws cov thwj tim thiab tsoom sid paub txog lo lus qhia tseem ceeb tshaj plaws uas yog lo lus qhia txog “Ntuj lub Ceeb Tsheej.” Peb hnov lo lus Ntuj lub Ceeb Tsheej ntau ntau zaus, peb muaj kev xav li cas? Ntuj lub Ceeb Tsheej yog qhov chaw uas peb yuav mus thaum peb puv ib puas nees kaum xyoo lawm, los Ntuj lub Ceeb Tsheej yog ib qho chaws uas peb yuav nrog Tswv Ntuj nyob thiab muaj Ntuj cov tshiab, muaj cov tsug plig zoo. Peb kuj muaj kev xav ntau yam kuj zoo kawg nkaus li mog. Tab sis mas, hauv lub Moo Zoo zaj no, Mas Tais xav piav qho tseem ceeb txog Ntuj lub Ceeb Tsheej pib ntawm no lawm, hauv lub ntiaj teb no. Nyem no, peb nyob hauv Ntuj lub Ceeb Tsheej lawm. vim li ntawd, cov tau txoj hmoov zoo yog cov uas Huab Tais Yes Xus hais: cov pluag hauv nruab siab, cov siab zoo, cov quaj ntsuag, cov tshaib thiab nqhis txoj kev ncaj, cov hlub luag tej, cov siab huv, cov tsim kev thaj yeeb, thiab cov raug luag hiam vim txoj kev ncaj. Huab Tais Yes Xus tab tom qhia peb kom paub zeem ceeb tias kev tau txoj hmoov zoo yog txoj kev ua lub neej. 
Lo lus “txoj hmoov zoo” los “Blessedness” tsis tsis txhais tias “ntshiab” los “holy” ib yam li peb siv Blessed Nicholas Bunkert los Leej Ntshiab Nicholas Bunkert. Thiab lo lus txoj hmoov zoo tsis muaj lub ntsiab hais txog “kev zoo siab,” “kev txaus siab” los happy, good mood. Tsis yog! Tab sis mas, txoj hmoov zoo muaj lub ntsiab txog “kev ua neej zoo,” lub neej uas muaj hmoov yog lub neej uas muaj Tswv Ntuj. Cov muaj hmoov kuj ntsib teeb meem, kuj muaj teeb meem, kuj muaj kev kub ntxhov, kev nyuaj siab hauv lub neej ib yam li tib neeg sawv daws thiab. Tab sis mas, lawv yeej tau, thaum muaj teeb meem, lawv tsis tso Tswv Ntuj pov tseg. Lawv muaj kev ntseeg nruaj nreb. “Cov txoj hmoov zoo yog cov raug luag hiam vim txoj kev ncaj, Ntuj lub Ceeb Tsheej yog lawv tug. Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo.”  
Kwv tij phooj ywg sawv daws, qhov tseem ceeb tshaj plaws uas Huab Tais Yes Xus xav qhia rau peb cov ntseeg sawv daws hnub no yog kev ua neej raws li Tswv Ntuj txoj kev. Cov tau txoj hmoov zoo yog tus yam ntxwv rau peb hais tias yus yuav ua lub neej zoo li cas. Ntawm no, yus puas muaj txoj hmoov zoo hauv yus lub neej? Kev ua neej hauv txoj hmoov zoo tsis yooj yim, qhov tiag los mas yeej nyuaj tshaj dua li qub, tab sis mas vim Tswv Ntuj tib leeg xwb, yus thiaj yeej tau. 
Thov Tswv Ntuj coj peb sawv daws hauv peb txoj kev ntseeg kom peb ntsib thiab pom txoj hmoov zoo hauv peb txoj kev ntseeg thiab hauv Tswv Ntuj txoj kev nyiam txoj kev hlub. Amen.