Hnub Chiv Tim 22 Lub 1 Hlis 2023 (Sunday Homily)

Hnub Chiv Tim 22 Lub 1 Hlis 2023
Lub caij Nyob Nruab Xyoo
Mas Tais 4: 12-23

“Neb raws kuv mus, kuv yuav tsa neb ua tub puav neeg.”
Kwv tij hmoob sawv daws, hauv Ntawv Moo Zoo,tom qab luag ntes Zam lawm, Huab Tais Yes Xus txuas ntxiv mus tshaj Ntuj lub Moo Zoo, “nej hloov siab mog, vim Ntuj lub Ceeb Tsheej los txog ze lawm.” Ua ntej Huab Tais Yes Xus los txog, Zam Ntxuav Pliag kuj tshaj tawm lo lus no thiab. Feem ntau peb hnov cov lo lus no hauv lub caij Tos Huab Tais ntau ntau zaus. Nyem no, peb nyob hauv lub caij nyob nruab xyoo, peb tseem hnov cov lus no ib zaj dua kuj vim tias qhov tiag los mas peb yuav tsum hloov siab tshiab txhua txhia hnub. Thaum yus ua txhaum los ua qhov tsis zoo, yus yuav tsum hloov siab tshiab, yus yuav tsum hloov txoj kev qub, tsim txoj kev tshiab hauv Tswv Ntuj.
Kwv tij sawv daws hauv Ntawv Moo Zoo hnub no, Huab Tais Yes Xus caw cov tub puav ntses 4 leej kom hloov txoj kev ua neej tshiab. Nws hu lawv kom tso lub neej qub tseg, ces tig los ua lub neej tshiab. Nej sawv daws saib, Huab Tais Yes Xus tsis hu cov kws Ntawv Ntshiab los cov kws txuj, tab sis mas nws hu cov tub puav ntses los tshaj Tswv Ntuj lo lus rau txhua haiv neeg nyob ntiaj teb no. cov lus no “nej hloov siab mog, vim Ntuj lub Ceeb Tsheej los txog ze lawm” yog cov lus uas Huab Tais Yes Xus cov thwj tim yuav tsum tshaj. Yes Xus cov thwj tim tsis siv lo lus tshaj Tswv Ntuj lub Moo Zoo xwb, tab sis mas yus yuav tsum ua, yuav tsum ua kom tshwm sim tuaj, yuav tsum ua kom muaj kev hloov, kom muaj kev sib nyiam sib hlub tshwm sim tuaj hauv yus zej zos, hauv yus teb chaws, thiab hauv lub Koom Txoos.
Hnub no, Huab Tais Yes Xus caw peb kom raws nws mus, peb puas xav raws nws mus? Pob Zeb, As Nres, Yas Kos, thiab Zam xaiv raws Huab Tais Yes Xus mus. Hnub no, lawv tso plhuav cov vas ntses tam sis ntawd, ces raws Yes Xus qab, lawv tso plhuav lub nkoj thiab lawv txiv tseg, ces raws Yes Xus mus. 4 tug thwj tim tau tso lub neej uas lawv nyiam tseg, lawv tau tso kev ua neej li qub, lawv tso yim neeg tsev neeg tseg, ces xaiv Huab Tais Yes Xus, kuj vim tias Huab Tais Yes Xus ua kom lawv pom txoj kev tshiab hauv Tswv Ntuj. Huab Tais Yes Xus yog txoj kev uas yuav coj lawv mus txog qhov pom kev. Hnub no, peb kuj ntsib txoj kev ntawd lawm, hnub no, peb kuj nrhiav tau txoj kev lawm. nej hloov siab mog!