NTHUAV NTAWV MOO ZOO HNUB TIM 21/1/2020

Lis Piam 2 Caij Nyob Nruab Xyoos.

Cov thwj tim de tej hnab nplej. (MK 2 : 23 - 28)
Muaj ib zaug, yog hnub Xas Npas Tos, Yes Xus hla ib thaj nplej, cov thwj tim taug kev, lawv pib de tej hnab nplej. Cov Fas Lis Xais hais rau Yes Xus tias : "Saib ! Vim li cas lawv ua tej yam txwv tsis pub ua hnub Xas Npas Tos ?"
Yes Xus hais rau lawv tias : "Nej tsis tau nyeem ib zaug txog qhov Das Vis ua thaum nws tsis muaj dab tsi noj, ces nws thiab nws cov kwv luag  tshaib plab lod ? Nws mus hauv Tswv Ntuj lub tsev li cas, thiab noj cov ncuav mov txi Ntuj uas kawg yog cov leej choj thiaj noj tau xwb, nws tseem muab rau nws cov kwv luag noj thiab. Thaum ntawd yog lub caij As Npias Thas ua tuam leej choj".
Ces Yes Xus hais rau lawv tias : "Ntuj tsim hnub Xas Npas Tos rau neeg, tsis yog tsim neeg rau hnub Xas Npas Tos, Neeg Leej Tub kuj yog tus tswv kav hnub Xas Npas Tos thiab."

Kwv tij sawv daws, txhua txhia hnub nyob rau hauv peb lub neej yuav yog Tswv Ntuj hnub, vim peb muab tas nrho peb lub neej thiab peb txoj sia cev rau peb tus Tswv saib xyuas txhua txhia hnub. Li ntawd, kev uas peb yuav tau txais kev dim, tsis yog tias, peb coj raws li Tswv Ntuj 10 lo lus qhia xwb, tiam sis, peb yuav tsum muaj txoj kev nyiam kev hlub, uas tawm hauv peb lub siab los, vim nws yog qhov tawm ntawm Huab Tais Tswv Ntuj tuaj thiab Huab Tais xav kom peb coj, xav kom peb ua, vim Huab Tais yog tus pub txoj kev dim rau peb. 
Kwv tij sawv daws, yog peb coj txoj cai nruj, tiam sis, peb tsis txawj hlub neeg, ces peb kuj zoo tsis txawv cov Fas Lis Xais uas nyob rau phau Ntawv Ntawv Ntshiab.
Yog vim li ntawd, Huab Tais Yes Xus thiaj tuaj qhia kom peb muaj lub siab nyiam thiab hlub neeg.
Huab Tais Yes Xus twb ua piv txwv rau peb ntsia lawm, thov kom peb yoog raws Huab Tais Yes Xus, ces peb yuav tau txais kev dim.

Tus nthuav : XH. Xyooj Tuam Lis, Zoo Tswv Zov Yaj