Cov tub tshaj Ntuj Lus Is Tas Lias ua hauj lwm rau cov haiv neeg tsawg nyob Npees Las Des teb tshaj 40 tawm xyoo

Txiv Plig Buzzi uas nws yog ib tug tub tshaj Ntuj Lus PIME neeg Is Tas Lias, nws tau nyob Npees Las Des teb 47 xyoo. Nws ua hauj lwm nyob hauv lub Cheeb Koom Txoos Rajshahi uas nyob Npees Las Des qaum teb, nws ua tshaj Ntuj Lus nyob Npees Las Des teb 40 tawm xyoo. Nws pab nyiaj rau lub Koom Txoos Npees Las Des kom tau pab cov me nyuam ntsuag thiab pluag txom nyem, thiab cov haiv neeg tsawg. 

Txiv Plig ua lub neej raws nws txoj kev ntseeg thiab nws txhim tsev kawm ntawv, pab cov neeg pluag txom nyem, ua tej lub tsev teev Ntuj nyob Sirajganj. 

Txiv Plig Buzzi tuaj txog Npees Las Des teb hnub tim 10 lub 1 hlis xyoo 1975, 4 xyoos tom qab Npees Las Des teb tau faib ua ib lub teb chaws tshiab los ntawm Pas Kis Taas. 

Txiv Plig Buzzi pib tshaj Ntuj Lus nyob hauv cov zej zog hauv lub nroog Sirajganj, uas muaj cov neeg ntseeg Kav Tos Liv li ntawm 827 leej. Txiv Plig lub siab zoo hlub cov me nyuam ntsuag thiab cov pluag txom nyem, vim tej yam no nws thiaj muab siab rau ua hauj lwm thiab saib xyuas 4 lub tsev kawm ntawv, nrhiav nyiaj los txhawb nqa cov me nyuam txoj kev kawm nyob hauv lub nroog Sirajganj.

Txiv Plig Buzzi yug hnub tim 6 lub 4 hlis xyoo 1943, nyob Varese hauv Is Tas Lias teb. Nws tau txais lub Cim Tiag Tes ua Txiv Plig hnub tim 21 lub 12 hlis xyoo 1968. 

Nws tseem ua hauj lwm pab cov tsev kawm ntawv rau cov me nyuam yaus thiab cov laus uas tsis paub ntawv li ntawm 20 lub tsev kawm ntawv. 

Nws qhib 48 lub tuam txhab nplej rau cov neeg liaj neeg teb uas pluag txom nyem. 

Nws tsim 20 lub tsev ntos ntaub rau cov poj niam thiab tau pab tsoom pej xeem hais plaub hauv tsev txiav txim yeej li ntawm 200 zaug, uas yog cov plaub ntug hais txog lawv tej av thiab chaw nyob.