Zaj nyeem hnub tim 15 lub 2 hlis 2023 (Daily reflection)

ZAJ NYEEM HNUB TIM 15 LUB 2 HLIS, HNUB PLAUB LUB LIS PIAM 6 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 8: 22-26)

Kwv tij Hmoob sawv daws, Ntawv Moo Zoo qhia peb tias Huab Tais Yes Xus tuav tus dig muag tes tawm mus sab nraud, Huab Tais Yes Xus mam pib kho nws ob lub qhov muag. Ua ntej mas nws pom plooj lias xwb, ces Huab Tais Yes Xus thiaj rov kho ib lwm ntxiv, mas nws mam pom tseeb.
Kwv tij Hmoob, zaj no xav qhia dab tsi pub rau peb?
Nyob hauv peb lub neej, peb nyob nrog qhov tsaus ntuj, tsis hais peb lub siab tsuas xav ntsoov txog qhov tsis zoo, peb tus ntsuj tus plig ntshaw mus taug txoj kev phem, peb lub tswv yim tsis nkag siab txog Tswv Ntuj, peb lub cev tsuas xaiv taug kev lom zem.
Tab sis Huab Tais Yes Xus yog qhov kaj, yog qhov pom kev tuaj rau peb, yog lub teeb tsom kev rau peb, coj peb tawm hauv qhov tsaus los nyob rau qhov kaj. Tsuas yog peb tso siab cia Huab Tais Yes Xus tuav peb tes thiab pab peb xws li tus dig muag hauv lub Moo Zoo hnub no, ces peb lub tswv yim yuav xav txog qhov zoo, peb tus plig yuav xaiv txoj kev ncaj taug, peb yuav to taub txog Tsvw Ntuj, peb yuav txawj txuag lub cev kom ntshiab.
Kwv tij Hmoob sawv daws, thaum peb tso siab rau Huab Tais Yes Xus, mas tej zaus ua ntej ntawd peb txawm ib sab nyob hauv qhov tsaus, ib sab nyob ntawm qhov kaj xws li tus dig muag pom tsis tau tseeb. Tab sis yog peb lees rau Huab Tais Yes Xus thiab cia Huab Tais Yes Xus kho peb ntxiv, mas peb yuav nyob rawv hauv qhov pom kev xws li tus dig muag ntsia pom tseeb.
Thov kom peb sawv daws nquag thov Tswv Ntuj pab peb, coj peb tawm hauv qhov tsaus txhua hnub mog.
Nyob zoo sawv daws.