Zaj nyeem hnub tim 20 lub 2 hlis 2023 (Daily reflection)

ZAJ NYEEM HNUB TIM 20 LUB 2 HLIS, HNUB OB LUB LIS PIAM 7 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 9: 14-29)

Kwv tij Hmoob sawv daws, thaum Huab Tais Yes Xus nrog tus me nyuam raug dab nplaig txhav tham, nws hais rau Huab Tais Yes Xus tias “Xib hwb, yog koj pab tau, thov koj pab peb, thov koj khuv leej peb mas!”
Txhais tau tias leej txiv ntawd, nws tsis ntseeg tias Huab Tais Yes Xus muaj peev kwm pab tau nws tus me nyuam, nws lub siab ua xyem xyav. Huab Tais Yes Xus thiaj hais tias “Tus neeg twg yog nws muaj kev ntseeg, mas nws yuav ua yam twg kuj tau.”
Leej txiv hnov li ntawd, nws thiaj ua ib siab ntseeg nruaj tias Huab Tais Yes Xus yeej pab tau nws tus me nyuam tiag, nws thiaj teb tias “Xib hwb, kuv ntseeg lawm tiag, kuv ntseeg tias kooj pab tau kuv tus me nyuam.” Nws tseem lees tias yav tas los nws kev ntseeg tsuas muaj me me xwb, nws hais ntxiv tias “Thov koj pab kuv, vim kuv ntseeg me me xwb!”
Kwv tij Hmoob sawv daws, peb puas zoo li tus leej txiv hauv lub Moo Zoo hnub no, peb puas ntseeg tiag tiag tias Huab Tais Yes Xus yog tus cawm peb, peb puas tso siab tias peb thov dab tsi ntawm Huab Tais Yes Xus, mas peb yuav tau raws li thov, peb puas lees tias peb lub ncauj lam thov tab sis lub siab tsis ntseeg?
Ib qho ntxiv, Huab Tais Yes Xus hais rau cov thwj tim tias “Hom dab ntawd, tsuas yog txoj kev thov Ntuj xwb thiaj ntiab tau!”
Hnub no, peb yuav thov Ntuj pab ntiab tus dab nplaig txhav thiab lag ntseg tawm hauv peb, tawm hauv cov tsis muaj kev ntseeg, kom peb thiab lawv hnov Huab Tais Yes Xus lub suab, hnov cov neeg txom nyem lub suab, kom peb muaj cuab kav tsa ncauj tshaj lub Moo Zoo rau cov nyob puag ncig peb, kom peb tsa suab hlo cav txog Tswv Ntuj lub txiaj ntsim lub koob meej mus li mog!
Nyob zoo sawv daws.