Tua thiab hlawv cov Txiv Plig Kav Tos Liv nyob Nis Zes Lias toob fab naj.

Hnub tim 15 lub 1 hlis no, ib tug Txiv Plig Kav Tos Liv raug hlawv tsev kub hnyiab tas thiab nws tuag, hos muaj ib tug raug tua thiab raug mob sab heev nyob Nis Zes Lias qaum teb. Thaum sij ntawm 2 teev ib tag hmo dua, nyob hauv lub zos Kafin-Koro, hauv lub xeev Niger. Muaj cov neeg phem nqa phom los sis yog cov tub sab tau mus hlawv Txiv Plig ib lub tsev, ces ua rau ib tug Txiv Plig raug hlawv kub hnyiab tas.

Cov tub ceev xwm hais tias : cov tub sab hlawv Txiv Plig Isaac Achi lub tsev, ces ua rau lub tsev thiab tus Txiv Plig kub hnyiab tas.

Hnub tim 15 lub 1 hlis no, lawv nrhiav pom Txiv Plig Isaac Achi lub cev ua hluav tag nyob hauv lub tsev teev Ntuj Leej Ntshiab Pob Zeb thiab Leej Ntshiab Paj Lug uas kub ua tshauv tag. Yog raws li lub Cheeb Koom Txoos Kav Tos Liv nyob Minna tshaj tawm.

Txiv Plig Collins Omeh khiav tau dim, tab sis nws raug tua thiab raug mob sab heev, tam sim no nws tseem pw nyob hauv tsev kho mob.

Tom qab ntawd tsis ntev, cov tub sab nkag mus hauv lub zos Dan Tsauni uas nyob hauv thaj tsam Kankara sab hnub poob, hauv lub xeev Katsina thiab ntes 5 tug neeg uas lawv tab tom yuav npaj mus teev Ntuj Hnub Chiv nyob ze lub tsev teev Ntuj.