Hnub Chiv Tim 26 Lub 2 Hlis 2023 (Sunday Homily)

Hnub Chiv Tim 26 Lub 2 Hlis 2023
Lub caij Plaub Caug
Mas Tais 4: 1-11

“Neeg tsis kawg muab mov xwb los yug txoj sia, neeg tseem muab txhua lo lus tawm ntawm Tswv Ntuj lub ncauj los yug txoj sia thiab.”
Nyob zoo, …
Hnub no yog thawj hnub chiv hauv lub caij Plaub Caug, Hauv Ntawv Moo Zoo hnub no peb hnov tias Huab Tais Yes Xus mus rau hauv teb chaws suab puam, nyob ntawd nws raug dab phem ntxias. Nyob ntawm teb chaws suab puam, Huab Tais Yes Xus ua dab tsi? Nws yoo mov thiab teev Ntuj. 
Mas Tais qhia ntxiv tias Huab Tais Yes Xus raug dab phem ntxias nws, tab sis mas, nws yeej kev ntxias tau. Thov peb saib, Tswv Ntuj kuj raug dab phem ntxias tau. Thov peb los saib ntawm kev ntxias 3 yam ntawm no. Kev ntxias yam tim 1: nws raug ntxias kom hais kom cov pob zeb txia ua mov vim Yes Xus tshaib plab kawg. Qhov no yog kev ntxias ntawm kev qia dub, yus pom yus tus kheej tib leeg xwb, yus tsis pom luag tej. Kev ntxias yam tim 2: nws raug ntxias kom dhia lawm puag hauv, ces Ntuj cov tshiab yuav nqa nws nyob hauv lawv txhais tes. Qhov no yog kev siv hwj chim tsis raug, tsis ncaj ncees. Kev ntxias yam tim 3:  nws raug ntxias kom txhos caug pe tus dab phem, mas nws yuav muab cov ceeb tsheej muaj koob meej nyob ntiaj teb tas huv si rau Yes Xus. Qhov no yog kev ntxias kom muaj tej hwj chim thiab muaj koob meej muaj suab muaj npe, muaj nyiaj muaj txiag nyob ntiaj teb no. 
Yes Xus yoo mov thiab teev Ntuj tau plaub caug hnub plaub caug hmo. Nws yeej tau kev ntxias. 
Lub caij plaub caug no, peb npaj peb tus kheej zoo li cas? Peb cov ntseeg sawv daws yuav tsum ua raws li Yes Xus, peb tus Huab Tais, tau qhia peb, yog qhov tias peb yuav tsum yoo mov thiab teev Ntuj. Kwv tij sawv daws, peb paub tias hauv Lub Koom Txoos Catholic ua ntej peb yuav ua dab tsi los yog ua hauj lwm dab tsi tseem ceeb tshaj, peb yuav siv sij hawm sau siab, peb yuav muaj sij hawm nyob twj ywm sau siab npaj sia, muaj kev cuam tshuam. Ua ntej yuav txais lub cim tiag tes, cov leej twj los deacon kuj yuav tsum sau siab. Ua ntej yuav txais lub cim ua Tswv Qhia los Vaj Qhia kuj yuav tsum muaj kev sau siab. Ua ntej yuav hais cog lus ua Leej Phauj los Leej Tij kuj yuav tsum muaj kev sau siab. Ua li ntawd, ua ntej mus txog lub caij Hla, peb kuj yuav tsum siv sij hawm xav tsoov txog yus tus kheej. Yus ua neej zoo li cas hauv txoj kev ntseeg txog Tswv Ntuj. Yus tseem muaj txhaum qhov twg, yus tseem ua txhaum li cas, yus kuj siv sij hawm npaj siab thiab txiav txim siab tias yus yuav dab tsi kom zoo tuaj. Yus yuav tso txoj kev txhaum pov tseg puas tau? Yus yuav tso qhov txhaum pov tseg puas tau? Qhov tseem ceeb tshaj plaws hauv lub caij Plaub Caug, tsis yog kev yoo mov, los kev yeem cia lub cev raug txom nyem, tab sis yog kev npaj yus lub siab lub ntsws, hloov lub tswv yim, hloov yus lub siab lub ntsws kom taug kev hauv txoj kev ncaj ncees los yog hauv Tswv Ntuj txoj kev. Thov peb cov neeg ntseeg sawv daws siv lub sij hawm no hauv lub caij Plaub Caug npaj siab npaj ntsws kom zoo mog!