Zaj nyeem hnub tim 4 lub 3 hlis 2023 (Daily reflection)

ZAJ NYEEM HNUB TIM 4 LUB 3 HLIS, HNUB XYA LUB LIS PIAM 1 CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 5: 43-46)

Cov kwv tij, nej hnov Huab Tais Yes Xus hais tias “Nej yuav nyiam nej cov yeeb ncuab, nej yuav thov Ntuj rau cov tsim txom nej”, cov lus no yog ntuas peb kom sis nyiam sis hlub, tsis txhob xaiv nyiam tus no dua tus tod, vim tias Tswv Ntuj yog kev nyiam, Tswv Ntuj twb nyiam ntiaj teb neeg sawv daws sib npaug. Yog tias peb rhuav daim ntsa zeb thaiv peb lub siab nyiam neeg pov tseg tau, mas peb thiaj yuav ua tau Tswv Ntuj cov tub cov ntxhais. 
Kwv tij Hmoob, yeej tsis yooj yim kiag li uas peb yuav nyiam tus ntxub peb, peb yuav thov Ntuj rau peb tus yeeb ncuab, peb yuav zam txim rau tus neeg ua phem rau peb.
Yog li mas nyob hauv lub caij Plaub Caug no, peb thiaj yuav ua tiag coj cov kab ke yoo thiab nquag teev Ntuj tsis tseg, mas peb thiaj yuav yoog tau peb lub siab lub ntsws, peb thiaj yuav qhib tau peb lub siab cia Leej Ntuj Plig Ntshiab los nyob hauv, mas peb thiaj yuav nyiam tau tus neeg ua tsis zoo rau peb, xws li Huab Tais Yes Xus tau ua piv txwv rau peb pom tias nws thov Leej Txiv Tswv Ntuj zam rau cov neeg muab nws tua, nws hlub thiab nyiam tas sawv daws, mas nws thiaj txaus siab tuag ntxuav ntiaj teb neeg lub txim txhaum nyob saum tus Ntoo Cuam.
Nyob zoo sawv daws.