Zaj nyeem hnub tim 7 lub 3 hlis 2023 (Daily reflection)

ZAJ NYEEM HNUB TIM 7 LUB 3 HLIS, HNUB NCO TXOG LEEJ NTSHIAB POJ SUA THIAB FES LIS XIS TIS
COV LUS NYOB HAUV MAS TAIS NTAWV MOO ZOO (MT 23: 1-12)

Kwv tij, hnub no Huab Tais Yes Xus hais tias thaum muaj ib tug neeg tuaj qhia nej ua zoo, tuaj qhia Tswv Ntuj lo lus pub rau nej, mas nej mloog nws thiab nej coj cov lus ntawd mus ua nyob hauv nej lub neej mog, tab sis nej tsis txhob yoog raws lawv tus yam ntxwv los tus cuj pwm. Qhov nej yuav yoog raws mas yog nej Leej Txiv thiab nej tus Xib Hwb; yog Tswv Ntuj thiab Leej Pleev.
Huab Tais Yes Xus lo lus no tseeb tiag, muaj ib txhia hais tias tus Txiv Plig los yog tus Xib Hwb ntawd niaj lis piam tuaj twm Ntawv Ntshiab rau peb mloog, qhia Ntuj kev cai pub rau peb, tab sis nws twb coj tus cuj pwm tsis zoo tsis ntxim peb yuav yoog raws, yog li mas peb yuav ua cas ntseeg tau nws!
Kwv tij, nej txhob ntseeg nws, tiam sis nej yuav qhib siab kom dav txais cov lus nws hais rau nej, nej cia cov lus ntawd nrov hauv nej lub siab lub tswv yim, nej muab siab rau mloog saib puas hnov Tswv Ntuj tab tom hais lus rau nej mloog.
Yog nej cuab pob ntseg kom zoo,qhib lub siab lub tswv yim mloog, mas nej yuav pom tias cov lus nej hnov ntawd tsis yog tawm ntawm nws lub ncauj los, tab sis yog tawm ntawm Tswv Ntuj lub ncauj los, yog Tswv Ntuj tab tom hais rau nej.
Kwv tij, ua cas peb thiaj tsum mloog cov lus tawm hauv Tswv Ntuj lub ncauj los, vim tias tsuas muaj Tswv Ntuj tib tug xwb uas thaum peb tsis kam lees paub nws, peb ua txhaum rau nws, peb tig nraub qaum rau nws, tsis kav nws zoo siab hlo tuag theej peb chaw, nws tsis hais kom peb pauj rov rau nws.
Yog li cov kwv tij, puas tsim nyog peb tsum mloog nws cov lus, puas tsim nyog peb yuav kawm ntawm nws, thiab ua raws li nws tus piv txwv.
Nyob zoo sawv daws.