Zaj nyeem hnub tim 8 lub 3 hlis 2023 (Daily reflection)

ZAJ NYEEM HNUB TIM 8 LUB 3 HLIS, HNUB NCO TXOG LEEJ NTSHIAB ZAM HWM NTOO CUAM
COV LUS NYOB HAUV MAS TAIS NTAWV MOO ZOO (MT 20: 17-28)

Cov kwv tij Hmoob, neeg lub sab xeeb yog dab tsi? Puas yog muaj suab muaj npe? Puas yog tau ua nom ua tswv? Puas yog tau ua tus neeg muaj hwj chim sawv daws hwm?
Sawv daws ua neej nyob hauv lub qab ntuj no puav leej xav zoo li ntawd tiag, tsis muaj tus twg yuav tsis hais tias cia kuv ua ib tug neeg me me nyob txheej qis qis cia rau sawv daws thuam sawv daws saib tsis taus. Yeej yuav tsis muaj tus twg yuav hais tau li ntawd.
Tab sis muaj ib tug tau qhib peb lub tswv yim kom pom thiab paub tias tus sawv daws yuav muab nws saib cia saum lub sab xeeb, sawv daws yuav nco txog nws mus li, mas tsis yog tus zoo li peb xav; tus ntawd yog tus tas nws ib sim neej, nws nyiam ua zoo li tus qhev tsob hwb sawv daws, pab zej pab zos.
Kwv tij, yog peb tig los saib peb cov neeg hauv lub zos, peb pom tias tus neeg twg thaum ua neej nyob, nws nyiam pab zej zos, hlub tshua sawv daws, zej zos txib nws ua dab tsi los nws nrawm nroos ua pub rau; thaum txog hnub nws txoj sia tu, tsis yuav tshaj tawm thov sawvd aws pab, tas lub zos yeej yuav tuaj koom tuaj pab nws lub ntees.
Hnub no, Huab Tais Yes Xus xav kom peb ua zoo li ntawd; Huab Tais Yes Xus thiaj ntuas cov thwj tim tias “Nyob hauv nej, leej twg xav ua tus loj, nws yuav ua nej tus tub txib; leej twg xav ua nej tus thawj, nws yuav ua nej tus qhev.”
Kwv tij Hmoob sawv daws, thov kom peb ntsia Huab Tais Yes Xus dai saum tus Ntoo Cuam, peb yuav pom tias nws yog Tswv Ntuj Leej Tub, yog peb tus Huab Tais, tab sis nws yeem ua tus tsob hwb sawv daws, ua tus pab sawv daws, nws tuag tab sis nws rov muaj txoj sia, nws tau txoj sia nyob mus li.
Nyob zoo sawv daws.