Hnub Chiv Tim 12 Lub 3 Hlis 2023 (Sunday Homily)

Hnub Chiv Tim 12 Lub 3 Hlis 2023
Lub caij Plaub Caug
Zam 4:5-15, 19-26, 39, 40-42

“Huab Tais, koj pub cov dej ntawd rau kuv, kom kuv tsis txhob nqhis dej ntxiv, kom kuv txhob tau rov tuaj ce dej ntawm no ntxiv.”
Nyob zoo, …
Kwv tij sawv daws, hauv Ntawv Moo Zoo hnub no, muaj ob peb yam kuv xav caw nej sawv daws nyob twj ywm thiab xav tswv yim txog Tswv Ntuj Lo Lus hauv hnub chiv no. Huab Tais Yes Xus thov dej haus ntawm ib tug poj niam Xas Mas Lias. Huab Tais Yes Xus tsis saib tsis tau tus poj niam ntawd ib yam li lwm cov Yus Das. Raws li cov Yus Das feem ntau ua, lawv tsis nrog cov Xas Mas Lias tham, lawv tsis mus ze cov Xas Mas Lias, lawv tsis mus kev hauv qhov chaws uas cov Xas Mas Lias nyob vim rau qhov hais tias lawv ntseeg tias cov Xas Mas Lias yog neeg tsis ntshiab, tsis dawb tsis huv. Vim tias cov Xas Mas Lias tsis yog Jews tiag tiag, tsis yog Israel tiag tiag. Vim li ntawd, cov Israel thiaj ntxub cov Xas Mas Lias tiag tiag. Tab sis mas, Huab Tais Yes Xus nrog ib tug Xas Mas Lias tham thiab thov haus dej ntawm. Tsis tas li ntawd, nws yog poj niam thiab. Qhov uas Yes Xus ua thiaj yog yam uas tsis tsim nyog ua thiab cov Israel txais tsis tau. 
Huab Tais Yes Xus xav qhia rau nws cov thwj tim tias nyob hauv Tswv Ntuj txoj kev hlub tsis muaj kev cais pab cais pawg, tsis muaj kev sib cav sib ceg. Cov uas luag tej saib tsis tau ib yam li tus poj niam Xas Mas Lias, Tswv Ntuj yeej hlub nws, Tswv Ntuj yeej nyob ze nws. Tswv Ntuj pub txoj kev cawm rau sawv daws txhua leej txhua tus, tsis hais cov Yus Das, tsis hais cov Xas Mas Lias, tsis hais cov muaj koob muaj hmoov, tsis hais cov txhaum. Tab sis mas, nyob ntawm peb mas peb yuav txais Tswv Ntuj lub txiaj ntsim los tsis txais. Tswv Ntuj tsis yuam peb. 
Tsis tas li ntawd, hnub Huab Tais Yes Xus qhia qhov tseem ceeb rau nws tias Huab Tais Yes Xus yog leej twg? “Leej twg hauv cov dej no tas tseem yuav rov nqhis dua. Hos tus haus cov dej uas kuv muab rau nws, mas nws yuav tsis nqhis ib zaug ntxiv. Cov dej uas kuv muab, yuav txia ua ib tug dej txhawv muaj txoj sia nyob mus li nyob hauv nws.” Dej pub txoj sia nyob mus li. Ib txwm li, tib neeg lub cev yuav tsum tau dej los pub, kom muaj zog, kom muaj ntshav, kom muaj txoj sia nyob. Tib neeg tus tsuj plig kuj zoo ib yam thiab. Peb xav tau Tswv Ntuj Lo Lus los pub txoj sia. Tswv Ntuj Lo Lus yog dej pub txoj sia nyob mus li. 
Ua li ntawd, mas peb yuav tsum teev Ntuj thiab thov Ntuj zoo li ib tug poj niam Xas Mas Lias no, “Huab Tais, koj pub cov dej ntawd rau kuv, kom kuv tsis txhob nqhis dej ntxiv, kom kuv txhob tau rov tuaj ce dej ntawm no ntxiv.” Thov kom Tswv Ntuj lo lus zaj no yog peb zaj teev Ntuj hnub no. peb thov Ntuj tsis tu ncua, ces Tswv Ntuj yuav pub rau peb os.
“Huab Tais, koj pub cov dej ntawd rau kuv, kom kuv tsis txhob nqhis dej ntxiv, kom kuv txhob tau rov tuaj ce dej ntawm no ntxiv.”
Nyob zoo sawv daws!