Zaj nyeem hnub tim 11 lub 3 hlis 2023 (Daily reflection)

ZAJ NYEEM HNUB TIM 11 LUB 3 HLIS, HNUB XYA LUB LIS PIAM 2 CAIJ PLAUB CAUG
COV LUS NYOB HAUV LUS KAS NTAWV MOO ZOO (LK 15: 1-3, 11-32)

Kwv tij, nyob hauv peb cov Hmoob yog peb muaj ib neeg txheeb ze tsis tsheej ham ua neeg tsis tsim txiaj, nyiam nrhiav plaub coj kev kub ntxhov los rau peb, mas peb muaj ib lo lus nyiam hais rau luag tej tias peb txiav kwv txiav tij nrog nws, leej twg yuav ua li cas rau nws los kom kav tsij ua, tsis tshuam nrog peb lawm. Tab sis thaum muaj neeg ua phem rau tus ntawd, mas peb lub siab yeej nyob tsis taus, vim peb kev txheeb ze, kev koom roj koom ntshav.
Peb yog neeg, peb twb muaj qhov no; yog li Tswv Ntuj yog tus tsim peb, yog peb Txiv, nws puas tseem hub peb tshaj qhov no mas!
hnub no, Huab Tais Yes Xus thiaj tau hais zaj paj lug peb tau hnov nyob hauv lub Moo Zoo, yog hais txog leej txiv muaj lub siab hlub nws tus me nyuam mus li, txawm tias tus me nyuam tsis hwm nws, tsis mloog nws lus. Tus me nyuam ua neeg tsis tsim txiaj, los tus ua txiv yuav hlub thiab zam rau nws tus me nyuam mus li.
Leej tiv tos ntsoov saib thaum twg tus me nyuam mam hloov siab tshiab ua neeg zoo, rov los cuag nws.
Kwv tij, Tswv Ntuj lub siab hlub neeg mas zoo li ntawd tiag! Tswv Ntuj tsis muab txim rau peb, tsis tso peb pov tseg. Tswv Ntuj tos nrhw peb rov los nrhiav nws, Tswv Ntuj pub lub sij hawm rau peb maj mam soj peb siab, kom pom txog peb txoj kev ua txhaum ua yuam kev, ces peb thiaj yuav txawj tu siab rau peb cov txhaum.
Kwv tij Hmoob sawv daws, Tswv Ntuj ua siab ntev tos peb, yog li mas hnub no txawm peb tau ua tus neeg phem neeg tsis zoo lawm los, thov kom peb txhob rov rau txim rau peb; tab sis peb yuav tig los cuag Tswv Ntuj, nkag los nrhiav Tswv Ntuj, hais ib lo lus tu siab rau peb tej kev txhaum kev yuam kev ntawd xws li tus tub loj leeb hauv lub Moo Zoo hnub no mog.
Nyob zoo sawv daws.