Zaj nyeem hnub tim 15 lub 3 hlis 2023 (Daily reflection)

ZAJ NYEEM HNUB TIM 15 LUB 3 HLIS, HNUB PLAUB LUB LIS PIAM 3 CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 5: 17-19)

Cov kwv tij Hmoob, Huab Tais Yes Xus hais tias “Kuv tsis tuaj rhuav Txoj Cai thiab cov yaj saub, kuv tuaj qhia ntxiv kom thoob. Tus twg hla ib txog cai me thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws txoj cai huv si thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.”
Cov kwv tij, Tswv Ntuj txoj cai txij thaum Mais Xes los txog niaj hnub no, mas tsis tau hloov li, tsuas yog qhia kom thoob thiab phim rau lub caij nyoog xwb.
Lub ntsiab mas yog kom sawv daws ua xis Tswv Ntuj siab.
Cov kwv tij, peb yog Tswv Ntuj haiv neeg mas peb ua dab tsi los peb txhob hla Tswv Ntuj Txoj Cai, thiab peb yuav tsum qhia rau lwm tus kom lawv txhob hla thiab mas peb thiaj yuav muaj txoj sia nyob hauv Ntuj lub Ceeb Tsheej xws li cov lus hauv ntawv Txoj Cai Ob tias “Nej mloog, nej coj raws txoj cai ntawd, ces nej yuav muaj txoj sia thiab tau mus nyob hauv lub teb chaws uas nej cov yawg koob tus Tswv Ntuj nuab rau nej nyob.”
Nyob zoo sawv daws.