Zaj nyeem hnub tim 16 lub 3 hlis 2023 (Daily reflection)

ZAJ NYEEM HNUB TIM 16 LUB 3 HLIS, HNUB TSIB LUB LIS PIAM 3 CAIJ PLAUB CAUG
COV LUS NYOB HAUV LUS KAS NTAWV MOO ZOO (LK 11: 14-23)

Kwv tij Hmoob sawv daws, Huab Tais Yes Xus kho ib tug neeg nplaig txhav kom nws rov hais taus lus. Tab sis cov neeg nyob ntawd lawv hiam tias Huab Tais Yes Xus ua tau li ntawd vim Huab Tais Yes Xus hais kom dab tuaj pab nws, thiab lawv xav kom Huab Tais Yes Xus ua ib lub cim rau lawv pom, mas lawv thiaj yuav ntseeg tias Huab Tais Yes Xus yog tus nqes saum ntuj los.
Cov kwv tij, nyob hauv peb Hmoob lub neej muaj ntau zaus peb pom cov neeg txawj ua hwj huam kho lwm tus kom zoo hauv lawv tej kev mob, xws li ua khawv koob, ua neeb saib yaig, los yog saib saub.
Peb puas xav tias yam lawv ua yog tuaj ntawm Tswv Ntuj tuaj los yog lawv thov dab pab lawv ua li ntawd.
Peb yuav paub tau, mas yog peb ntsia saib tus neeg ntawd puas ua raws Tswv Ntuj Txoj Cai; yog teev Tswv Ntuj tib leeg xwb, nyiam Tswv Ntuj dua lwm yam, thiab nyiam lwm tus.
Kwv tij, muaj coob leej ntau tus hais tias tos kuv pom Huab Tais Yes Xus ua raws li kuv lub siab ntshaw tso, kuv mam ntseeg. Hos nej, mas nej txhob twv Ntuj li ntawd, nej txhob yuam Ntuj li ntawd.
Nej yuav tso siab rau Tswv Ntuj, mloog Ntuj lus thiab ua xis Tswv Ntuj siab nyiam mas nej thiaj yuav muaj zog ntaus yeej tus tuaj ntxias nej mog.
Nyob zoo sawv daws.