NTHUAV NTAWV MOO ZOO HNUB TIM 25/1/2020

LIS PIAM 2 CAIJ NYOB NRUAB XYOOS.
Hwm txog Leej Ntshiab Paj Lug yuav lub siab tshiab.
Yes Xus hais kom cov Thwj Tim mus tshaj lub Moo Zoo. (MK 16 : 15-18)
Yes Xus hais rau lawv tias : "Nej mus thoob qab ntuj, nej tshaj lub Moo Zoo rau txhua leej txhua tus. Tus twg ntseeg thiab txais lub cim ntxuav, mas Ntuj yuav cawm nws, hos tus tsis ntseeg yuav raug txim. Cov cim no yuav nrog nraim cov uas yuav ntseeg : lawv hu txog kuv lub npe, lawv yuav ntiab dab tau, lawv yuav hais ib co lus tshiab, lawv yuav tuav nab tau, yog lawv haus tshuaj lom neeg, tshuaj yuav tsis ua xwv txheej rau lawv, thaum lawv tsa tes rau saum cov neeg mob, mas cov mob yuav zoo." 

Kwv tij sawv daws, niaj hnub no, Huab Tais Yes Xus kuj tseem hais rau peb zoo li thaud nws tau hais rau cov Hauv Paus Xa Lus. Kom peb tshaj Huab Tais lub Moo Zoo nyob rau ntawm peb cov lus qhia thiab peb tej hauj lwm uas peb ua rau luag tej, thaum peb tau muab siab rau pab cov neeg txom nyem, cov quaj ntsuag, cov pluag thiab cov uas tsis muaj neeg quav ntsej txog lawv. Peb tau coj Tswv Ntuj lub Moo Zoo mus txog lawv, kom lawv tau txais kev dim, kom lawv dim ntawm ib puas tsav yam kev tsaus ntuj, kev dub doog, kev phem kev txhaum, lawv dim ntawm dab phem txhais tes. Zoo yam li Leej Ntshiab Paj Lug uas thaum nws tau ntsib Huab Tais Yes Xus, nws tau hloov nws lub neej mus txhua yam, nws tso plhuav kev phem kev txhaum tseg, tau coj lub neej tshiab, nws tso ib puas tsav yam kev ntshaw nyob qab ntuj no tseg, ces raws Yes Xus mus thiab koom ua ib ke nrog Huab Tais.
Kwv tij sawv daws, tsim nyog peb cov ntseeg yuav saib Leej Ntshiab Paj Lug los ua ib tug qauv zoo rau peb taug.

Tus nthuav : XH. Xyooj Tuam Lis, Zoo Tswv Zov Yaj