Vaj Qhia Paj Lug 6

Vaj Qhia Paj Lug 6

Leej Ntshiab Paj Lug 6 lub qub npe hu ua Giovanni Battista Montini, nws yug hnub tim 26 lub 9 hlis xyoo 1887 nyob Gin Cecio ze Bresc, Is Tas Lias teb. Nws tuag hnub tim 6 lub 8 hli xyoo 1978. Tau ua Leej Ntshiab hnub tim 14 lub 10 hli xyoo 2018. Ua kab ke tsa nws ua Leej Ntshiab hnub tim 26 lub 9 hlis xyoo 2018. Vaj Qhia Paj Lug 6 ua Vaj Qhia nyob Is Tas Lias teb txij xyoo 1963 txog 2018. Yog nyob hauv lub caij Vas Tis Kas tim ob 1962 txog 1965. 
Vaj Qhia tau tshaj lus thiab qhia cov neeg ntseeg Kav Tos Liv uas lawv tab tom hloov, nws tus Tswv Qhia tau ntsib teeb meem thiab lub Koom Txoos tsis ruaj khov raws cov xwm txheej lub zim txwv ntawd. Vaj Qhia Paj Lug 6 yog ib tug kws txoj cai tus tub uas yog tub xov xwm thiab tub tseev tsim nyob hauv zej zog. Chiv thawj Montini, nws tau txais kev kawm nyob hauv tsev, vim nws lub cev ntaj ntsug ua qob qis tsis muaj zog. Tom qab mas nws tau kawm nyob hauv lub nroog Bresc, thiab raug tsa ua Txiv Plig hnub tim 29 lub 5 hlis xyoo 1920, ces nws raug xa mus nyob Los Mas kom tau kawm ntxiv mus thiab nws raug xaiv ua Vas Tis Kas tus tiam lis. 
Xyoo 1939, Montini raug tsa ua Vaj Qhia tus pwm tsav txawv teb chaws. Xyoo 1944 nws tau ua tus kav xwm lis txhua yam hauj lwm. Lub 11 hlis xyoo 1954 Vaj Qhia Pis Os 12 tau xaiv nws ua Tswv Qhia nyob Mib Las thiab Vaj Qhia Zam 23 tsa nws ua Tswv Qhia Liab xyoo 1958. Ces xyoo hnub tim 21 lub 6 hli xyoo 1963, nws raug tsa ua Vaj Qhia thiab siv lub npe Paj Lug 6.
Vaj Qhia Montini pib ua Vaj Qhia tom qab lub rooj sab laj Vas Tis Kas 2, chiv thawj mas txhua yam ntxhov kawg. Vaj Qhia Paj Lug 6 tau ua tus coj lub rooj sab laj 3 zaug los ntawm Vas Tis Kas Ob. Nws nquag txhawb nqa txhua yam hauj lwm uas nws tau ua rau cov Txiv Plig nyob Mib Las.
Vaj Qhia Paj Lug 6 ntsib cov hauj lwm txaus ntshai, vim nws yuav tsum txiav txim siab. Nws yuav tsum xyuam xim thiab paub txog cov xwm txheej kom ntxaws, ces nws txoj kev txiav txim siab nyob hauv lub xyoo ua kom nws muaj peevxwm. 
Xyoo 1968 nws tau luam ib phau ntawv Humanae Vite (Of Human Life). Cov lus no ua rau ntau leej nkag siab yuam kevthiab lawv tiv Vaj Qhia cov lus heev kawg. Nws txoj kev nyob tab seeb thiab ua Txiv Plig (Sacerdotalis caelibatus thaum lub 6 hli 1967) ua rau neeg xyav txog nws ncha ntws. 
Txij nws ua Vaj Qhia Paj Lug 6 los, nws tau ua ntau yam meej tseeb yog kev kawm thiab daws cov teeb meem ua kub ntxhov ntawm lub ntiaj teb, thiab muaj coob leej nug txog qhov tseeb ntawm kev tshaj Ntuj Lus nyob Mib Las xyoo 1954 txog 1963. Ntau xyoo tag los nws tau mus As Mes Lis Kas teb thiab As Fiv Kas teb, nws hais txog cov tub zog thiab cov neeg pluag txom nyem ntau dua. Cov teeb meem no nyob puv tag hauv nws thawj tsab ntawv Ecclesiam suam. Tom qab no mas yog qhov tseem ceeb ntawm kev vam meej Populorum uas nrov kawg (Progress of the People).
Tom qab lub rooj sab laj Vas Tis Kas Ob tiav lawm, Vaj Qhia Montini teeb ib lo lus nug uas yog lo lust seem ceeb ntawm kev tshaj Ntuj Lus : 
“Tswv Ntuj lub Koom Txoos, koj hu koj tus kheej li cas ?” 
Ua ntej yuav teb lo lus no Vaj Qhia Paj Lug 6 tau ua phau ntawv hais txog cov Thwj Tim txoj kev mus kev, yog lub sij hawm nyuab heev rau Vaj Qhia yuav tawm rooj mus txhua xeev ntuj. 
Kev tawm rooj thawj zaug ntawm Vaj Qhia yog mus tsim koob hmoov ntawm thaj chaw ntshiab lub 1 hlis xyoo 1964. Thiab nrog tus Tswv Qhia ntawm Constantinople sib tham nyob Yes Lus Xas Les. Tib xyoo ntawd thaum lub qab xyoo Vaj Qhia kuj tau mus tsham Is Ntias teb thiab nws yog thawj tug Vaj Qhia mus tsham As Xias. 
Xyoo tom qab lub 4 hlis, Vaj Qhia tau mus tsham As Mes Lis Kas teb yog thawj zaug thiab nws thov kom muaj kev thaj yeeb hauv lub Leej Haum Kuj lub rooj sab laj loj nyob Nyus Yos (New York). Nws tau mus tsham Fas Tis Mas nyob Pos Tws Nkas teb thiab Is Taas Npus thiab Es Fes Xos nyob Tws Kis teb. Lub 8 hli 1968 Vaj Qhia mus Npos Kos Tas, Kos Loos Npias, Us Nkas Ntas thiab As Fiv Kas sab hnub tuaj. 
Thaum lub caij nplooj ntoos zeeg xyoo 1970, nws yog tus Vaj Qhia mus kev deb tshaj lwm tus Vaj Qhia nyob hauv cov liv xwm. Nws siv sij hawm 10 hnub mus tsham Tes Has Laas, Pas Kis Taas, Fis Lis Pees, Xas Muas sab hnub tuaj, Aus Thas Lias, Is Ntos Nes Xias, Hooj Koos thiab Xis Laas Kas teb. 
Vaj Qhia Paj Lug 6 pom tias neeg txoj kev tshaib nqhis, yog qhov qhia tias Vaj Qhia tau muab siab rau ua kom lub Koom Txoos nyob Los Mas thiab lwm cov Koom Txoos sib haum xeeb, thiab tsis hais cov tsis muaj kev teev hawm uas lawv tsis teev hawm dab tsi kiag li los sawv daws sib haum xeeb.