Zaj nyeem hnub tim 1 lub 4 hlis 2023 (Daily reflection)

ZAJ NYEEM HNUB TIM 1 LUB 4 HLIS, HNUB XYA LUB LIS PIAM 5 CAIJ PLAUB CAUG
COV LUS NYOB HAUV ZAM NTAWV MOO ZOO (Z 11: 45-57)

Kwv tij Hmoob sawv daws, tom qab Huab Tais Yes Xus tsa Las Ntxas Los sawv hauv kev tuag los lawm, mas muaj coob leej ntseeg tias Huab Tais Yes Xus yog Tswv Ntuj Leej Tub tiag, tab sis kuj muaj coob leej tseem tsis ntseeg.
Cov tsis ntseeg, lawv mus hais qhia rau cov Fas Lis Xais, mas cov Fas Lis Xais thiaj ua rooj sab laj tias lawv yuav muab Huab Tais Yes Xus tua.
Cov kwv tij, yog vim Huab Tais Yes Xus yuav tsum tuag xwb, mas cov Fas Lis Xais lawv txoj kev ntshai thiaj yuav tas, raws li Kais Fas cov lus tias ‘cia ib tug neeg xwb, this tsoom pej xeem tuag, mas tas haiv neeg thiaj tsis txhob tuag.’
Tab sis kwv tij Hmoob sawv daws, txoj kev tuag yuav tuaj nphav Huab Tais Yes Xus sai sai no, tsis yog yuav this tsoom His Xas Lais xwb, Huab Tais Yes Xus txoj kev tuag no, tseem this tas nrho ntiaj teb neeg sawv daws thiab, Huab Tais Yes Xus txoj kev tuag no, yuav sau Tswv Ntuj cov me nyuam rov los ua ib pab, ua ib haiv neeg.
Kwv tij Hmoob sawv daws, Huab Tais Yes Xus tau hais tseg tias ‘tus ntseeg txog kuv, txawm nws tuag lawm los, nws yuav tau txoj sia’.
Li ntawd, hnub no peb yuav thov Tswv Ntuj pub txiaj ntsim rau peb, kom peb ntseeg txog Huab Tais Yes Xus yam khov kho, mas peb thiaj yuav tau txais Tswv Ntuj txoj kev cawm nyob hauv peb txoj sia.
Nyob zoo sawv daws.