NIAM THIAB TXIV YOG THAWJ TUG XIB HWB QHIA KEV NTSEEG

Lo lus hais tias : niam thiab txiv yog thawj tug xib hwb qhia kev ntseeg ntawm cov me nyuam, mas yog ib lo lus ua lub nra hnyav kawg rau cov ua niam ua txiv tam sim no. Vim cov ua niam ua txiv yuav ntsib ntau yam teeb meem los ntawm tej pab pawg neeg coob coob zim txwv no thiab, yam li kev nrhiav noj nrhiav haus, kev ua liaj ua teb thiab kev nrhiav nyiaj txiag los yug cov me nyuam hauv lub cuab yim neej. Kev nrhiav noj nrhiav haus yug lub cuab yim neej nyem no, mas tsis yog yooj yim kiag. Dhau ntawm kev nrhiav noj nrhiav haus sab nraud lawm, kuj tseem yuav tsum saib xyuas fab kab lis kev cai, fab ntsuj plig thiab neeg tus yam ntxwv, los sis kev ua lub neej mus raws yus txoj kev teev hawm. Tsis tas li ntawd, cov ua niam ua txiv qee leej kuj tsis nco txog nws txoj kev ua xib hwb qhia kev ntseeg los yog kev ntseeg txog Tswv Ntuj nyob hauv lub cuab lub yig lawm. Yog yus hnov qab yam tseem ceeb nyob hauv lub cuab yim neej, mas yus yuav ua li cas ua xib hwb qhia kev ntseeg rau cov me nyuam ?
Nyob hauv lub Koom Txoos Kav Tos Liv phau ntawv qhia kev ntseeg (CCC) txheej 3, qib 2223 thiab 2226 qhia tias : yam tseem ceeb ntawm cov ua niam ua txiv uas tsim nyog lawv yuav tau paub tau nyeem, pab xav tswv yim thiab thov Ntuj, mas yog yuav nquag teev Ntuj thiab thov Tswv Ntuj pab lawv ua lawv cov hauj lwm niaj hnub kom ruaj khov, kom tej yam lawv ua yog kev nyiam kev hlub nyob ntawm Tswv Ntuj xub ntiag. Niam thiab txiv yog thawj tug xib hwb uas yuav qhia tej me nyuam, kom lawv paub txog qhov siab qhov qis thiab ua ib tse neeg sib nyiam sib hlub, txawj zam txhaum, txawj sib hwm, coj ncaj ncees thiab sib pab. Kev pab luag tej, mas yuav zoo siab pab dawb paug tsis vam luag pauj rov qab. Kom cov me nyuam txawj ntsia pom qhov phem thiab tsis zoo. Cov niam cov txiv yuav txawj saib lawv cov me nyuam thiab ua tus qauv zoo rau cov me nyuam. Yuav qhia li cas kom tej me nyuam thiaj yuav paub tias yam twg lawv ua tsis yog, thiab yog qhov zoo tshaj rau cov me nyuam.
Kev yuav qhia kev ntseeg rau tej me nyuam, mas cov ua niam ua txiv yuav tau qhia rau thaum lawv tseem yau, ces thiaj yuav txi taus txiv. Yog tas ib tsev neeg sib pab txhawb nqa kom txoj kev ntseeg nyob hauv lub cuab yig loj hlob, mas yog raws li Ntawv Ntshiab qhia ntag. Kev ntseeg nyob hauv lub cuab yim neej, yuav pab coj yus lub neej mus txog txoj sia nyob mus li. Cov ua niam ua txiv muaj cai qhia kom tej me tub me nyuam txawj teev Ntuj thiab pom txog qhov Tswv Ntuj hu lawv, vim lawv yog Tswv Ntuj me nyuam. Tsev teev Ntuj yog lub Cim Yug qhov chaw nyob thiab yog cov neeg ntseeg lub plawv. Yog qhov chaw qhia ntseeg ntawm cov me nyuam thiab cov niam cov txiv. Kev ntseeg hauv lub cuab yim neej, kuj yog txoj kev pab luag tej thiab qhia luag tej kom paub txog qhov tseem ceeb hauv txoj kev ntseeg. Vim li ntawd, cov niam cov txiv yuav qhia kom lawv cov me tub me nyuam paub kev ntseeg thiab paub txog tej pawg neeg ntseeg coob coob. Ces cov me tub me nyuam loj hlob tuaj, lawv thiaj yuav paub txog qhov tseem ceeb nyob hauv lawv lub neej thiab ua Tswv Ntuj cov me nyuam mus li.

Tus txhais : Lis Maib, Zoo Tswv Zov Yaj