NTHUAV NTAWV MOO ZOO HNUB TIM 27/1/2020

LIS PIAM 3 CAIJ NYOB NRUAB XYOOS.
Yes Xus tsev neeg txhawj. (MK 3 : 22 - 30)
Yes Xus los tsev, ces rov muaj neeg coob tuaj sib sau, Yes Xus lawv tsis xyeej noj mov li. Yes Xus cov neeg hnov li ntawd, lawv tawm tuaj ntes nws, vim lawv hais tias : "Nws tsis meej pem lawm."
Cov thoob xwm tuaj pem Yes Lus Xas Les tuaj hais tias : "Nws raug dab Npes Ntxes Npus."
Lawv tseem hais tias : "Nws hu txog tus tuam thawj dab los ntiab dab tawm."
Yes Xus hu lawv los ntawm nws, ces nws ua paj lug hais rau lawv tias : "Xas Tas yuav ua cas ntiab tau Xas Tas ? Yog ib lub teb chaws rov ua kom nws sib tawg, mas lub teb chaws ntawd nyob tsis ruaj. Yog ib tse neeg rov ua kom nws sib tawg, mas lub tsev ntawd yuav nyob tsis tau. Ua li yog Xas Tas rov sawv tiv Xas Tas, mas nws tawg, ces nws yuav nyob tsis tau, nws kawg yuav piam sij tas. Tsis muaj leej twg nkag tau mus hauv tus neeg muaj zog tsev, mus lwg nws lub cuab tam, yog tsis xub muab tus muaj zog khi tso, mas nws yuav lwg tsis tau tus muaj zog lub tsev. Kuv hais tseeb rau nej, Ntuj yuav zam ib puas tsav yam txhaum rau neeg tej tub ki, tsis hais tej txhaum los tej lus thuam Ntuj lawv tau tsawm. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws ib zaug li : nws ua ib qho txhaum nyob mus li." 30 Vim lawv hais tias : "Yes Xus raug ib tug dab tsis huv."

Nyob rau hauv zaj no, peb yuav pom tias, cov thoob xwm uas tuaj pem Yes Lus Xas Les tuaj, lawv hiam Huab Tais Yes Xus tias, yog Yes Xus siv tus dab loj uas muaj lub npe hu tias Npes Ntxes Npus lub hwj chim los ntiab dab. Tab sis, Huab Tais Yes Xus tsis cia lawv cov lus thuam no los thaiv Huab Tais kev tshaj Ntuj lus, thiab ua rau nws txoj hauj lwm qaug, Huab Tais xav tso lawv dim ntawm kev ua dab qhev thiab kev txhaum kev npam. Vim neeg tsis muaj peev xwm yuav zam tau cov txhaum ua neeg tau ua, kawg yog Huab Tais Tswv Ntuj tib leeg xwb thiaj yuav zam txhaum tau rau neeg. Tab sis, peb puas kam cia Huab Tais pab cawm peb, kom nws tso peb dim ntawm peb cov txhaum, peb puas cia Huab Tais Yes Xus los kho peb thiab pab peb, vim Huab Tais niaj hnub tos peb, thiab nws zoo siab yuav cawm peb sawv daws txhua tus neeg uas los cuag nws.

Tus nthuav : XH. Xyooj Tuam Lis, Zoo Tswv Zov Yaj