Zaj nyeem hnub tim 11 lub 4 hlis 2023 (Daily reflection)

ZAJ NYEEM HNUB TIM 11 LUB 4 HLIS, HNUB PEB LUB LIS PIAM 1 CAIJ HLA
COV LUS NYOB HAUV ZAM NTAWV MOO ZOO (Z 20: 11-18)

Kwv tij, thaum Mab Liab Mas Ntas Las tsis pom Yes Xus tus qauv nyob hauv lub qhov ntxa, nws quaj tu siab, nws xav tias yog muaj neeg tuaj muab Yes Xus tus qauv mus tso cia rau lwm qhov lawm, yog li thaum nws pom Huab Tais Yes Xus, nws thiaj xav tias yog tus saib lub vaj. Mab Liab hais rau nws tias “Huab tais, yog koj nqa nws lub cev lawm no, koj qhia kuv saib koj muab tso qhov twg lawm?”
Ces Huab Tais Yes Xus thiaj mam hu Mab Liab lub npe, ua rau nws feeb hlo, ces Mab Liab thiaj paub tias tus ntawd yog Yes Xus. Mab Liab nyiam Huab Tais Yes Xus heev, nws thiaj xav tuav Huab Tais Yes Xus cia nrog nws nyob, tab sis Huab Tais Yes Xus tsis xav li Mab Liab xav, ces Huab Tais Yes Xus thiaj hais rau Mab Liab tias “Koj txhob tuav kuv, vim kuv tseem tsis tau nce mus cuag Leej Txiv. Koj mus cuag kuv cov kwv tij, koj hais qhia rau lawv.”
Kwv tij, Huab Tais Yes Xus nyiam peb sawv daws, nws tsis xav kom peb muab nws saib ua peb tib leeg tus Huab Tais xwb, Huab Tais Yes Xus xav kom peb tawm mus qhia txog nws lub Moo Zoo rau lwm tus xws li nws tau hais rau Mab Liab.
Kwv tij, yog peb nyiam Huab Tais Yes Xus tiag, mas peb yuav maj zeeg mus tshaj Yes Xus lub Moo Zoo no rau cov neeg peb nyiam, coj lawv tuaj ntsib Huab Tais Yes Xus nrog peb ua ke.
Nyob zoo sawv daws.