Zaj nyeem hnub tim 21 lub 4 hlis 2023 (Daily reflection)

ZAJ NYEEM HNUB TIM 21 LUB 4 HLIS, HNUB RAU LUB LIS PIAM 2 CAIJ HLA
COV LUS NYOB HAUV ZAM NTAWV MOO ZOO (Z 6: 1-15)

Kwv tij Hmoob sawv daws, lub Moo Zoo peb hnov hauv hnub no yog piav txog thaum Huab Tais Yes Xus ua kom cov mov ntsu tuaj txaus yug tsib txhiab leej neeg noj. Hnub no peb yuav tsis hais tias Huab Tais Yes Xus ua li cas cov mov thiaj ntsu tuaj txaus sawv daws noj. Qhov peb yuav hais mas yog qhov tias niaj zaus thaum peb nrog peb niam peb txiv, peb kwv peb tij, los yog peb cov me nyuam, los yog tus neeg peb nyiam peb hlub noj mov ua ke, mas yog lub sij hawm peb muaj kev zoo siab xyiv fab kawg. Yog li thaum cov neeg nrog Huab Tais Yes Xus noj mov ua ke mas lawv thiaj zoo siab heev. Huab Tais Yes Xus los nws kuj pom li ntawd, ces nws thiaj xav koom nrog peb noj mov ua ke, yog thaum peb sib txoos ua Thaj Txi Ntuj. Thaum ntawd, peb yuav zaum nyob ncig Huab Tais Yes Xus, ces Huab Tais Yes Xus yuav tuav lub ncuav mov, nws muab tsa siab ua Tswv Ntuj tsaug thiab faib rau peb tau nrog nws noj ua ke. Thaum peb noj lub ncuav mov Huab Tais Yes Xus pub rau peb noj ntawd, peb yuav zoo siab rau qhov tias yog lub ncuav mov yug peb tus plig kom rov muaj zog, kom rov nyob npuab Huab Tais Yes Xus dua.
Yog li mas cov kwv tij, niaj lis piam Hnub Chiv, peb yuav tau mus koom txais cov ncuav mov Huab Tais Yes Xus muab faib rau peb nyob hauv lub txoos teev Ntuj mog.
Nyob zoo sawv daws.