Zaj nyeem hnub tim 15 lub 5 hlis 2023 (Daily reflection)

ZAJ NYEEM HNUB TIM 15 LUB 5 HLIS, HNUB OB LUB LIS PIAM 6 CAIJ HLA

COV LUS NYOB HAUV ZAM NTAWV MOO ZOO (Z 15: 26-16: 4)

Kwv tij Hmoob, peb cov Hmoob ntseeg txog Yes Xus hauv lub Koom Txoos Kav Tos Liv nyob rau tiam no mas tsis tshua raug kev iab hiam hnyav pes tsawg lawm, vim peb nyob rau cov teb chaws qhib dav rau txoj kev ntseeg. Tsis zoo li tej haiv neeg hauv cov teb chaws nyob sab Av Fis Kas, mas lawv tseem niaj hnub raug cov neeg siab phem tsim txog kom thim kev ntseeg.

Hnub no lub Moo Zoo hais txog thaum Huab Tais Yes Xus qhia cov thwj tim txog tej yam kev iab lawv yuav ntsib tom qab Huab Tais Yes Xus nce mus saum ntuj lawm.

Thaud mas cov neeg ntseeg txog Yes Xus raug neeg hiam, raug neeg tsim txog tiag, tiam sis nyem no, cov neeg ntseeg txog Yes Xus tsis yog raug neeg hiam thiab tsim txom xwb, lawv raug tus dab qhov muag tsis pom hiam thiab tsim txom, raug lub tswv yim phem ntxias saib lawv puas ua tim khawv txog lawv txoj kev ntseeg txog Yes Xus.

Txawm li ntawd, los thov kom peb sawv daws txhob ua siab me vim Huab Tais Yes Xus twb tau xa Leej Ntuj Plig Ntshiab los nyob saum peb lawm, nws yuav ua tus ‘nplij’ thiab ‘pab’ peb kom txhob ntog rau hauv dab phem txhais tes. Thiab Leej Ntuj Plig Ntshiab yuav qhia ‘qhov tseeb’ rau peb kom peb txawj ua tim khawv txog qhov tseeb, vim peb twb ‘xub nrog Huab Tais Yes Xus nyob’, peb twb ‘paub Huab Tais Leej Txiv thiab Huab Tais Leej Tub’ lawm.

Kwv tij, nyob hauv Thaib teb muaj ib qho xwm hais txog cov ntxhais sib tw niam nkauj ntsuab, ces lawv kom 3 tug ntxhais tau suab ntau tshaj plaws los saib hmoov. Muaj ib tug ntxhais yog cov neeg ntseeg, nws tau suab ntawm tsoom pej xeem ntau tshaj cov, nws tsis kam saib hmoov vim tsis haum rau Ntuj kev cai. Tus tswv cuab lub sam thiaj tsis kheev thiab hais ntau yam ntxias nws thiab ntuas nws, tsis kav tus ntxhais no ua siab tuag nthi tsis saib, txawm tias qhov no tej zaus yuav ua rau nws plam lub cib fim tau txais lub mom niam nkauj ntsuab.

Kwv tij, tus ntxhais no muaj Leej Ntuj Plig Ntshiab nyob hauv nws, nws ua tim khawv txog qhov tseeb raws li cov lus hauv hnub no tiag. 

Nyob zoo sawv daws.